Target ng Provincial Health Office (PHO) ng Romblon katuwang ang iba’t ibang Rural Health Unit (RHU) sa lalawigan na makamit ang “herd immunity” sa mga bata upang maprotektahan ang komunidad laban sa mga vaccine-preventable diseases tulad ng tigdas, polio, hepatitis, at iba pang nakahahawang sakit.
Ayon kay Dr. Renato Menrige Jr. ng Rural Health Unit ng Ferrol, mahalaga ang pagbabakuna upang maprotektahan ang mga tinatawag na “susceptible individuals” o mga taong madaling dapuan ng sakit, lalo na ang mga batang wala pang limang taong gulang.
Ipinaliwanag ni Menrige na ang mga bakuna ay nagsisilbing proteksyon laban sa mga sakit na maaaring magdulot ng malalang komplikasyon at maging sanhi ng pagkamatay ng bata kapag hindi naagapan.
Kabilang sa mga sakit na maiiwasan sa pamamagitan ng bakuna ang hepatitis B, diphtheria, pertussis, tetanus, measles o tigdas, rubella, at polio.
“Ang gusto natin ay maintindihan ng tao ang kahalagahan ng bakuna dahil nagbibigay ito ng proteksyon laban sa mga vaccine-preventable diseases,” ayon kay Menrige.
Binigyang-diin niya na pangunahing prayoridad ng pamahalaan ang mga batang edad zero hanggang limang taon dahil sila ang mas vulnerable sa malalang komplikasyon ng mga sakit.
Kaugnay nito, target ng PHO Romblon sa ilalim ng isasagawang Supplemental Immunization Campaign ng Department of Health (DOH) sa Agosto na mabakunahan ang 95 porsyento ng halos 26,000 bata sa lalawigan upang makamit ang herd immunity sa komunidad.
Ipinaliwanag ni Menrige na mahalaga ang herd immunity upang maprotektahan hindi lamang ang mga nabakunahan kundi maging ang mga hindi maaaring tumanggap ng bakuna dahil sa medical conditions.
“Ang herd immunity po ay parang bakod. Kapag matibay po ito at mataas ang proteksyon ng komunidad, kahit iyong mga hindi nabakunahan ay napoprotektahan din,” paliwanag niya. Ayon pa sa health official, kapag mataas ang vaccination coverage sa isang komunidad ay bumababa rin ang posibilidad ng pagkalat ng mga nakahahawang sakit.
Hinimok naman ng PHO at mga RHU ang mga magulang na samantalahin ang libreng bakuna mula sa pamahalaan upang maiwasan ang pagdami ng mga batang hindi kumpleto sa immunization.
Dagdag pa ni Menrige, hindi man ganap na mapigilan ng bakuna ang pagkakasakit, malaking tulong pa rin ito upang hindi lumala ang kondisyon ng bata at maiwasan ang mga komplikasyong maaaring ikamatay nila.
