Naglaan si Senator Erwin Tulfo ng tig-₱3 milyong Assistance to Individuals in Crisis Situation (AICS) fund ngayong taon para sa bawat isa sa 17 bayan ng lalawigan ng Romblon bilang tulong sa mga residenteng nangangailangan ng medical, burial, educational, at iba pang financial assistance.
Ito ang ibinahagi ni Governor Trina Alejandra Q. Firmalo-Fabic sa isinagawang turnover ceremony ng dalawang bagong patrol jeep na ipinagkaloob din ng tanggapan ni Senador Tulfo para sa Odiongan Municipal Police Station at Romblon Municipal Police Station.
Ayon sa gobernador, malaking tulong ang pondong inilaan para sa mga lokal na pamahalaan dahil mas marami pang residente ang matutulungan sa ilalim ng AICS program, partikular ang mga pamilyang may problemang pinansyal at nangangailangan ng agarang ayuda.
Nagpasalamat din si Firmalo-Fabic kay Tulfo sa patuloy nitong pagtulong sa lalawigan sa pamamagitan ng iba’t ibang programa at assistance projects.
Dagdag pa ng gobernador, ginamit ng pamahalaang panlalawigan ang bahagi ng AICS fund na ipinagkaloob sa kanila upang makabili ng prosthetic legs at prosthetic arms para sa mga Romblomanong naputulan ng paa at kamay.
Ayon sa kanya, malaking tulong ito sa mga benepisyaryo upang makabalik sa kanilang normal na pamumuhay at magkaroon muli ng kakayahang makapagtrabaho at makatulong sa kanilang pamilya.
Sinabi rin ng gobernador na patuloy ang pakikipag-ugnayan ng pamahalaang panlalawigan sa iba’t ibang national government agencies at mga opisyal upang makapaghatid pa ng karagdagang serbisyo at assistance programs para sa mga residente ng Romblon.
Ang AICS ay isa sa mga social assistance programs ng pamahalaan na nagbibigay ng agarang tulong pinansyal sa mga indibidwal na nakararanas ng krisis o emergency situations.
Discussion about this post