Pinasinayaan noong Mayo 16 ang 1-megawatt rental generator set sa National Power Corporation (NAPOCOR) Diesel Power Plant sa bayan ng San Fernando bilang bahagi ng hakbang upang matugunan ang kakulangan sa suplay ng kuryente sa Isla ng Sibuyan.
Dumalo sa inagurasyon si General Manager Engr. Rene Fajilagutan kasama ang mga miyembro ng Board of Directors ng Romblon Electric Cooperative (ROMELCO) mula sa iba’t ibang distrito ng Sibuyan Island.
Ayon sa ROMELCO, matagal nang hinihiling ng kooperatiba sa NAPOCOR ang pagdadala ng rental genset upang matugunan ang kakulangan sa power supply sa Sibuyan lalo na bago pa magsimula ang Semana Santa.
Dumating sa isla ang rental genset noong Mayo 12 at agad isinailalim sa commissioning at preparasyon para sa operasyon sa tulong ng mga opisyal at engineers ng NAPOCOR kabilang si Engr. Ricky Umban.
Sinabi ni Fajilagutan na minadali ang preparasyon ng mga makina upang agad maresolba ang rotational brownouts at load shedding na naranasan ng mga residente sa nakalipas na mga linggo.
Sa kasalukuyan, ayon sa ROMELCO, wala nang rotational brownouts na ipinatutupad sa buong Sibuyan Island at naibabalik na ang mas maayos na serbisyo ng kuryente sa tatlong munisipyo ng isla.
Ipinaliwanag din ng kooperatiba na hindi lamang sa Sibuyan nararanasan ang problema sa power supply kundi maging sa iba’t ibang bahagi ng bansa dahil sa matinding init ng panahon na nakaaapekto sa kapasidad at operasyon ng mga planta ng kuryente.
