Isinagawa noong Mayo 15 ang pamamahagi ng Special Training for Employment Program (STEP) starter toolkits sa Romblon National Institute of Technology (RNIT) para sa mga nagtapos sa iba’t ibang technical-vocational courses sa lalawigan.
Dinaluhan ang aktibidad ng mga opisyal ng Technical Education and Skills Development Authority (TESDA) Romblon at mga benepisyaryo ng scholarship program.
Kabilang sa mga tumanggap ng starter toolkits ang mga nagtapos ng Bread and Pastry Production NC II at Plant Crops mula sa RNIT; Shielded Metal Arc Welding NC II mula sa Technical Academy of Skills and Knowledge; at Organic Small Ruminants at Driving NC II mula sa Provincial Training Center–Romblon.
Layunin ng programa na matulungan ang mga trainees na makapagsimula ng sariling kabuhayan at magamit ang kanilang natutunang kasanayan sa paghahanap ng trabaho o pagnenegosyo.
Ayon sa TESDA Romblon, malaking tulong ang mga starter toolkits upang magkaroon agad ng kagamitan ang mga graduates na maaari nilang gamitin sa kanilang hanapbuhay matapos makumpleto ang kanilang training.
Kabilang sa mga benepisyaryo si Loriely Castro ng Looc na nagtapos ng Bread and Pastry Production NC II sa ilalim ng STEP program.
Nagpasalamat din si Merlinda Galario ng Ferrol matapos niyang makapagtapos ng Driving NC II sa ilalim ng scholarship program ng TESDA.
Ayon kay Galario, malaking tulong ang naturang training upang madagdagan ang kanyang kaalaman at magkaroon ng mas magandang oportunidad sa trabaho at kabuhayan.
Umabot sa kabuuang ₱3.4 milyon ang halaga ng scholarship at starter toolkits na ipinamahagi sa mga benepisyaryo.
Ang pondo para sa scholarship at toolkits ay nagmula sa congressional fund ni Congressman Eleandro Jesus F. Madrona bilang bahagi ng suporta sa technical-vocational education at skills development sa lalawigan.
Patuloy namang hinihikayat ng TESDA ang mga residente ng Romblon na samantalahin ang mga libreng training at scholarship programs ng ahensya upang magkaroon ng dagdag na kasanayan at oportunidad sa trabaho.
