Inilabas na ang 15-man line-up ng Gilas Pilipinas na sasabak sa FIBA Asia Cup 2025 Qualifying Tournament laban sa New Zealand sa darating na Nobyembre 21, 2024, at laban naman sa Hong Kong sa Nobyembre 24, 2024. Ang parehong laro ay gaganapin sa Mall of Asia Arena.
Ang mga kasali sa line-up ay sina Justin Brownlee, Dwight Ramos, Chris Newsome, Scottie Thompson, Kai Sotto, Junemar Fajardo, Calvin Oftana, AJ Edu, Kevin Quiambao, CJ Perez, Carl Tamayo, Jaime Malonzo, Japeth Aguilar, Mason Amos, at Ange Kouame. Ang koponan ay muling pamumunuan ng beteranong head coach na si Tim Cone.
Ang mga laban na ito ay bahagi ng 2nd window ng qualifying tournament, kasabay ng iba’t ibang qualifying matches sa buong mundo. Ang Gilas ay bahagi ng Group B kasama ang New Zealand, Hong Kong, at Chinese Taipei. Kailangang manalo ang Gilas sa parehong laban upang makapag-qualify sa FIBA Asia Cup 2025, na gaganapin sa Jeddah, Saudi Arabia mula Agosto 5–17, 2025. Ang defending champion ng torneo ay ang Australia.
Inaasahan ni Coach Tim Cone na sa tulong ng kanilang malalim na roster ay magagawa nilang gulatin ang Tall Blacks ng New Zealand at makuha ang kanilang unang panalo laban sa kanila. Sa apat na nakaraang paghaharap ng dalawang koponan sa qualifying tournaments, hindi pa nagtatagumpay ang Gilas laban sa New Zealand. Gayunpaman, optimistiko si Cone na magbabago ang kasaysayan sa darating na laro.
Naipanalo na ng Gilas ang kanilang unang dalawang laban noong 1st window ng qualifiers laban sa Hong Kong at Chinese Taipei noong Pebrero 2024. Sa kasalukuyan, parehong may 2–0 record ang Gilas Pilipinas at New Zealand, habang parehong 0–2 record naman ang Chinese Taipei at Hong Kong.
Patuloy na gumagawa ng kasaysayan ang Gilas Pilipinas. Ilan sa kanilang kamangha-manghang tagumpay ang pagkapanalo sa Asian Games noong 2023 laban sa Jordan at ang makasaysayang upset win kontra sa world no. 6 na Latvia sa FIBA Olympic Qualifying Tournament noong Hulyo 2024.
