Sumailalim sa dalawang araw na Deputation Seminar-Workshop for Law Enforcement Officers ang 52 pulis mula sa iba't ibang Municipal Police Stations sa Tablas Island at Romblon Island upang higit na mapalakas ang pagpapatupad ng Republic Act No. 4136 o Land Transportation and Traffic Code sa lalawigan.
Isinagawa ang pagsasanay noong July 15 sa Provincial Government Extension Office sa Barangay Rizal, Odiongan sa pangunguna ng Romblon Police Provincial Office (PPO) sa ilalim ni Police Colonel Rexton Sawi, katuwang ang Land Transportation Office (LTO)-Romblon District Office sa pamumuno ni Supervising Transportation Regulation Officer Jocelyn Rillo.
Layunin ng seminar-workshop na palakasin ang kaalaman at kakayahan ng mga law enforcement officers sa tamang pagpapatupad ng mga batas-trapiko at higit pang mapaigting ang road safety sa lalawigan.
Kabilang sa mga paksang tinalakay ang road safety concepts, traffic law enforcement procedures, motor vehicle registration, driver's licensing, Electronic Traffic Operations (E-TOP), at iba pang mahahalagang polisiya at regulasyon na pinangunahan ng mga resource speakers mula sa LTO.
Ayon kay Lt. Col Ledilyn Ambonan, tagapagsalita ng Romblon PPO, ang pagsasanay ay bahagi ng patuloy na pagpapalakas ng koordinasyon sa pagitan ng PNP at LTO upang matiyak ang mas epektibong pagpapatupad ng mga batas-trapiko at mabawasan ang mga paglabag at aksidente sa kalsada.
Matapos ang seminar, maaari nang kumuha ng deputation examination sa LTO ang mga kalahok bilang bahagi ng proseso upang maging deputized law enforcement officers, na magbibigay sa kanila ng karagdagang awtoridad sa pagpapatupad ng mga probisyon ng Land Transportation and Traffic Code.
Discussion about this post