Nanawagan si Romblon Governor Trina Firmalo-Fabic ng masusing pagsusuri sa naging pag-apruba ng Sangguniang Bayan ng San Fernando sa resolusyong nag-eendorso sa aplikasyon ng Altai Philippines Mining Corporation (APMC) para sa deklarasyon ng mining project feasibility at ipinanukalang operasyon ng pagmimina sa bayan.
Sa isang pahayag, sinabi ni Fabic na bagama't bahagi pa lamang ng mas malawak na proseso ang naturang endorsement at hindi pa ito nangangahulugang pinal na pag-apruba ng proyekto, ang usapin ay hindi dapat minamadali dahil malaki ang maaaring maging epekto nito sa lalawigan.
Ayon sa gobernador, nararapat lamang na sumailalim ang panukala sa masusing pag-aaral at mabigyan ng sapat na pagkakataon ang mga mamamayan na maipahayag ang kanilang saloobin.
Binigyang-diin din niya ang kahalagahan ng pangangalaga sa natatanging biodiversity at ecological significance ng Sibuyan Island, na aniya ay likas na yaman na hindi na madaling maibabalik kapag nasira.
“Ang tunay na kaunlaran ay hindi nasusukat lang sa dami ng mga proyektong naipatutupad, kundi sa kakayahan nating tiyakin na ang pag-unlad ay hindi isinasakripisyo ang kalikasan na siyang pinagmumulan ng buhay at kabuhayan ng ating mga mamamayan,” ani Fabic.
Iginiit din ng gobernador na nananatiling matatag ang paninindigan ng Pamahalaang Panlalawigan na ang pag-unlad ng Romblon ay dapat kaakibat ng pangangalaga sa kalikasan.
Dagdag pa niya, makikipagtulungan ang kanyang tanggapan sa mga mamamayan at iba pang sektor upang maisulong ang mga desisyong inuuna ang pangmatagalang kapakanan ng mga Romblomanon at ng mga susunod na henerasyon.
Nauna nang inaprubahan ng Sangguniang Bayan ng San Fernando ang isang resolusyon na nag-eendorso sa aplikasyon ng APMC, isang hakbang na umani ng iba't ibang reaksyon mula sa mga stakeholder at environmental groups sa lalawigan.
Discussion about this post