Nagtapos ang 25 residente ng Barangay Victoria, San Andres sa kursong Organic Agriculture Production NC II sa ilalim ng Special Training for Employment Program (STEP) ng Technical Education and Skills Development Authority (TESDA) Romblon.
Ang STEP ay isang scholarship program ng TESDA na nagbibigay ng libreng community-based skills training upang mapalawak ang kaalaman at kakayahan ng mga benepisyaryo at mapataas ang kanilang oportunidad sa trabaho at kabuhayan.
Ayon kay TESDA Romblon Provincial Director Atty. Glenn Sartillo, naglaan ang pamahalaan ng mahigit ₱700,000 para sa pagsasanay ng mga iskolar. Aniya, libre ang training at assessment na karaniwang nagkakahalaga ng ₱23,000, habang bawat trainee ay tumanggap din ng ₱4,640 bilang training support fund.
Ipinagmalaki rin ni Sartillo na nakapagtala ang batch ng 100 porsiyentong passing rate sa competency assessment.
“Sana po ito'y maging puhunan ninyo para makakuha kayo ng trabahong nais ninyo, trabahong makapagpapabago ng inyong buhay, ng inyong pamilya at ng ating komunidad,” ani Sartillo.
Isa sa mga nagtapos, si Jayvie Manocay, ay nagsabing malaking tulong ang pagsasanay upang madagdagan ang kanyang kaalaman at mapalawak ang oportunidad sa paghahanap ng trabaho.
“Marami po akong natutunan, lalo na sa paggawa ng organic fertilizer. Bilang elementary graduate, malaking dagdag po ito sa aking knowledge at skills na magagamit ko sa paghahanap ng trabaho,” ani Manocay.
Samantala, ibinahagi naman ni Melavie Galibo, isang licensed criminologist, na bagama't malayo sa kanyang propesyon ang agrikultura, marami siyang natutunan sa 29-araw na pagsasanay, kabilang ang paggawa ng brooding pen at wastong pag-aalaga ng organic chicken.
Ayon kay Galibo, nagbigay rin sa kanya ng inspirasyon ang programa upang balang araw ay makapagsimula ng sariling negosyo sa larangan ng agrikultura.
“Sobrang laking bagay po nito. Nagkaroon po ako ng plano na balang araw ay makapagnegosyo gamit ang mga natutunan ko sa agriculture,” aniya.
Nagpasalamat din ang dalawang benepisyaryo sa TESDA sa pagbibigay ng libreng pagsasanay at sinabing ang pinakamahalagang natanggap nila ay ang kaalaman na maaari nilang magamit sa pangmatagalang kabuhayan.
Ginawaran ng sertipiko ang mga nagsipagtapos sa seremonyang dinaluhan ni Romblon Representative Eleandro Jesus “Budoy” Madrona bilang panauhing pandangal.
Ang pagsasanay ay bahagi ng mga intervention ng pamahalaan upang makapagbigay ng oportunidad sa kabuhayan at trabaho sa mga residente ng Barangay Victoria.
