Mahigit 1,000 ektarya ng lupain sa iba't ibang bayan ng Romblon ang sasailalim sa Massive Coconut Planting Program at Coconut Hybridization Program ng Philippine Coconut Authority (PCA) bilang bahagi ng pagpapalakas ng industriya ng niyog sa lalawigan.
Ayon kay PCA Romblon Division Chief I Antipas C. Naorbe Jr., layunin ng mga programa na mapataas ang produksyon ng niyog sa pamamagitan ng pamamahagi ng de-kalidad na coconut seedlings at pagbibigay ng insentibong pinansyal sa mga magniniyog.
Sa ilalim ng Participatory Coconut Planting Project (PCPP), target na matamnan ang 100 ektarya sa Alcantara o katumbas ng 14,300 seedlings, at 200 ektarya sa Ferrol na may 28,600 seedlings. Magkakaroon din ng tig-100 ektarya sa Santa Fe at San Agustin sa pakikipagtulungan ng mga lokal na pamahalaan at iba pang partner agencies.
Kasabay nito, ipagpapatuloy rin ng PCA ang mga natitirang target mula sa mga nakaraang programa, kabilang ang 250 ektarya sa San Andres, 150 ektarya sa San Agustin, at 150 ektarya sa Odiongan.
Samantala, sa ilalim ng Coconut Farmers and Industry Development Plan (CFIDP) at Coconut Hybridization Program, target namang mapagtamnan ang 236 ektarya sa pitong barangay sa San Fernando, kung saan 33,748 coconut seedlings ang itatanim. Makatatanggap din ang mga kalahok na magsasaka ng kabuuang ₱3.68 milyon bilang insentibo.
Saklaw din ng programa ang 200 ektarya sa Cajidiocan na may target na 28,600 seedlings at 234 ektarya sa Barangay Pato-o, Odiongan, kung saan 33,462 seedlings ang itatanim.
Samantala, nakapamahagi na ang PCA ng ₱315,315 na insentibo sa 46 magniniyog sa Barangay Bagsik at Madalag, Alcantara bilang bahagi ng unang yugto ng Participatory Coconut Planting Project (PCPP).
Inaasahan ng PCA na makatutulong ang malawakang pagtatanim at hybridization ng niyog upang mapataas ang produksyon, mapalakas ang kita ng mga magniniyog, at higit pang mapaunlad ang industriya ng niyog sa Romblon.
