Dalawang pamilyang may sira-sira at hindi ligtas na tirahan sa Barangay Victoria, San Andres ang tumanggap ng bagong bahay sa isinagawang turnover ceremony ng Revitalized Pulis sa Barangay (R-PSB) ng Romblon Police Provincial Office (PPO) nitong Sabado.
Ang dalawang amakan houses ay itinayo sa pamamagitan ng pagtutulungan ng mga pulis, lokal na pamahalaan, mga katuwang na ahensya ng gobyerno, at mga residente ng barangay bilang bahagi ng R-PSB Quick Impact Projects.
Personal na dumalo sa turnover ceremony sina Romblon Representative Eleandro Jesus “Budoy” Madrona at Police Regional Office (PRO) MIMAROPA Regional Director PBGen Christopher Dela Cruz, kasama ang iba pang opisyal ng pamahalaan at kapulisan.
Nagpahayag naman ng kasiyahan si Congressman Madrona sa matagumpay na pagpapatupad ng proyekto. Aniya, natutuwa siyang makita ang pagtutulungan ng iba't ibang ahensya ng pamahalaan, kapulisan, lokal na pamahalaan, at komunidad upang mabigyan ng maayos at ligtas na tirahan ang mga pamilyang nangangailangan.
Ayon naman kay Dela Cruz, ang turnover ng mga bahay ay patunay ng kongkretong resulta ng pagkakaisa ng pamahalaan at komunidad sa paghahatid ng mga serbisyong kailangan ng mga mamamayan.
“Napakagandang pagkakataon ito para makita natin kung ano ang nagiging resulta kapag nagtutulong-tulong ang mga ahensya ng gobyerno. Ito ang resulta ng whole-of-government approach,” ani Dela Cruz.
Dagdag pa niya, ang pagbibigay ng ligtas na tirahan, kasabay ng iba pang programang pangkabuhayan at pagsasanay, ay bahagi ng layunin ng pamahalaan na mapabuti ang kalagayan ng mga pamilya at maisulong ang pangmatagalang kaayusan at kaunlaran sa mga komunidad.
Ikinatuwa naman ng dalawang benepisyaryong pamilya ang kanilang bagong tahanan. Bukod sa mga bahay, tumanggap din sila ng karagdagang tulong mula kay Congressman Madrona at sa mga alkalde na dumalo sa programa.
Ang Revitalized Pulis sa Barangay (R-PSB) ay isang programa ng Philippine National Police (PNP) na gumagamit ng whole-of-government approach upang maihatid ang mga pangunahing serbisyo ng pamahalaan sa mga komunidad.
Bukod sa pagpapanatili ng kapayapaan at kaayusan, isinusulong nito ang mga programang pangkabuhayan, pagsasanay sa kasanayan, at mga quick impact projects sa pakikipagtulungan ng mga lokal na pamahalaan, mga national government agencies, at iba pang katuwang na organisasyon upang mapabuti ang buhay ng mga mamamayan at mapalakas ang pag-unlad sa mga barangay.
