Humigit-kumulang 90 negosyante mula sa mga barangay ng Gutivan, Cambajao, Lico, at Lumbang Weste sa bayan ng Cajidiocan, Sibuyan Island ang nakibahagi sa Micro-Enterprise Development Training at Basic Business Management Training na inorganisa ng Department of Trade and Industry (DTI) kamakailan.
Ang nasabing programa ay isinagawa sa pangunguna ni DTI Negosyo Center Coordinator Jay Rabino katuwang ang mga kinatawan mula sa Department of Social Welfare and Development.
Layunin ng programa na mabigyan ng kinakailangang kaalaman ang mga negosyante, lalo na ang mga nagsisimula pa lamang, upang matutunan nila ang mga mabisang pamamaraan sa pagpapatakbo at pagpapalago ng kanilang mga negosyo.
Sa pamamagitan ng mga pagsasanay na ito, natutulungan din ang mga negosyante na makapag-ambag sa pag-unlad ng kanilang mga komunidad.
Patuloy naman ang suporta ng lokal na pamahalaan ng Cajidiocan sa mga ganitong inisyatibo ng DTI, na naglalayong palakasin at gawing matagumpay ang mga lokal na negosyo sa kanilang bayan.
