Muling magpapatupad ng dagdag-singil sa pamasahe ang Montenegro Shipping Lines na epektibo simula Abril 6, araw ng Lunes.
Ayon sa source ng Romblon News Network, ipatutupad ang panibagong pagtaas sa karamihan ng ruta ng kumpanya, kabilang ang mga biyaheng papunta at paalis ng lalawigan ng Romblon. Inaasahang maglalabas ang kumpanya ng updated na fare matrix bago ang implementasyon ng bagong singil.
Ang pagtaas ay kasunod ng inilabas na abiso ng Maritime Industry Authority (MARINA) na nagpapahintulot sa mga domestic shipping companies at operators na magpatupad ng hanggang 30 porsiyentong pagtaas sa passenger fare at cargo freight rates dahil sa patuloy na pagtaas ng presyo ng fuel.
Sa advisory ng MARINA, pinapayagan ang pagtaas mula sa base fare o published rate na nakasaad sa certificate of public convenience ng mga shipping operator. Mas mataas ito kumpara sa naunang pinayagang 20 porsiyentong adjustment.
Gayunman, nananatiling may 20 porsiyentong limitasyon ang rate adjustment para sa transportasyon ng agricultural products at iba pang essential commodities upang mapanatiling kontrolado ang presyo ng mga pangunahing bilihin.
Inatasan din ng MARINA ang mga shipping companies at operators na ipaalam sa ahensya at sa publiko ang anumang dagdag-singil tatlong araw bago ito ipatupad, sa pamamagitan ng pahayagan, posting sa mga pantalan, barko, ticketing offices, o sa kanilang opisyal na website at social media accounts.
Matatandaang noong Marso 23 nang unang magpatupad ng dagdag-singil sa pamasahe ang Montenegro Shipping Lines kasunod ng pagtaas ng presyo ng fuel.
