Arestado ang isang lalaki na 19 taon nang pinaghahanap ng batas sa kasong homicide sa isinagawang operasyon ng pinagsanib na puwersa ng pulisya sa Barangay Dapawan, Odiongan nitong April 13, 2026.
Isinagawa ang operasyon bandang alas-9:30 ng umaga sa pangunguna ng Romblon RIT at Regional Intelligence Division ng PRO MIMAROPA, katuwang ang Odiongan Municipal Police Station, Ferrol Municipal Police Station, at PIT-Romblon ng RIU4B.
Naaresto ang suspek sa bisa ng warrant of arrest na inilabas noong Pebrero 26, 2007 ni Hon. Jose M. Madrid, Executive Judge ng Regional Trial Court sa Odiongan, Romblon, para sa kasong homicide na may inirekomendang piyansang ₱40,000.
Kasalukuyang nasa kustodiya ng Odiongan Municipal Police Station ang suspek para sa kaukulang dokumentasyon at disposisyon.
Pinuri naman ni Provincial Director PCOL Rexton F. Sawi ang mga operatiba sa matagumpay na operasyon at binigyang-diin ang kahalagahan ng koordinasyon at dedikasyon sa kampanya laban sa mga wanted na indibidwal.
Ayon kay PCOL Sawi, patuloy ang kanilang pagsisikap na matunton at maaresto ang mga wanted persons bilang bahagi ng pagpapanatili ng kaayusan at seguridad sa lalawigan ng Romblon.
