Ibinahagi ni Rodne Galicha ang karanasan ng Sibuyan Island sa Romblon bilang kinatawan ng lokal na komunidad sa Local Communities and Indigenous Peoples Platform (LCIPP) biregional gathering ng United Nations Framework Convention on Climate Change (UNFCCC).
Sa kanyang presentasyon noong Martes, inilahad ni Galicha ang tinatawag na ridge-to-reef collaboration sa pagitan ng Sibuyan Mangyan Tagabukid at mga lowland communities, kung saan ang pangangalaga sa kagubatan at watershed ay may kaugnayan sa suplay ng pagkain, tubig, at enerhiya ng isla, kabilang ang mini-hydropower.
Binanggit din ang mga lokal na praktis tulad ng “sayap” at “tikop,” na tumutukoy sa kolektibong pangingisda at pagbabahaginan sa komunidad.
Ayon kay Galicha, ang Bayay Sibuyanon Inc., na isang UNFCCC-accredited local community-based organization sa Pilipinas, ay nagsisilbing ugnayan ng komunidad at katutubong grupo sa pamamagitan ng paggamit ng internet connectivity para sa pagpapalitan ng kaalaman, access sa early warning systems, edukasyon, at koordinasyon sa pamahalaan.
Tinalakay rin niya ang papel ng local at regional development councils bilang mga mekanismo kung saan naipapahayag ng mga komunidad ang kanilang pananaw at nakikilahok sa mga proseso ng paggawa ng polisiya.
Samantala, binanggit din sa presentasyon ang mga isyu kaugnay ng pagmimina sa isla, kabilang ang tinatayang humigit-kumulang 7,000 ektarya ng kagubatan na saklaw ng mga aprubado at nakabinbing aplikasyon para sa pagmimina.
Naipahayag din ang ilang naging karanasan ng komunidad kaugnay ng environmental protection efforts, kabilang ang mga insidente noong mga nakaraang taon.
Discussion about this post