Tumanggap ng cash relief assistance ang kabuuang 340 franchised tricycle drivers sa bayan ng Odiongan mula sa Department of Social Welfare and Development bilang bahagi ng patuloy na hakbang ng pamahalaan upang maibsan ang epekto ng pagtaas ng presyo ng gasolina.
Isinagawa ang pamamahagi ng ayuda alinsunod sa direktiba ni Ferdinand R. Marcos Jr. na tulungan ang mga sektor na direktang naaapektuhan ng pagtaas ng presyo ng petrolyo.
Ayon kay DSWD MIMAROPA Regional Director Benchie Gonzales, layunin ng programa na matulungan ang mga driver sa kanilang pang-araw-araw na gastusin, lalo na sa patuloy na pagtaas ng presyo ng krudo na may direktang epekto sa kanilang kabuhayan.
Kasabay nito, isinagawa rin ang sabayang pamamahagi sa anim na bayan sa Tablas Island kung saan 412 tricycle drivers ang makatatanggap ng tig-₱5,000 na ayuda.
Sa buong lalawigan, tinatayang nasa 1,942 tricycle drivers ang makikinabang sa unang batch ng cash relief assistance program na inaasahang magtatagal hanggang Abril 20.
Ikinatuwa ng mga benepisyaryo ang tulong, lalo na sa gitna ng pagtaas ng presyo ng gasolina na lumampas na sa ₱100 kada litro sa ilang lugar.
Isa sa mga tumanggap, si Richard Perez, ay nagsabing makakatulong ang ₱5,000 na ayuda sa gastos sa gasolina at pang-araw-araw na pangangailangan. Ayon naman kay Rey Urbano, malaking tulong ang subsidy para sa kanilang pamilya sa kabila ng hindi na matatag na kita mula sa pamamasada.
Samantala, umaasa si Efren Fallaria na magpapatuloy ang ganitong uri ng tulong habang nananatiling mataas ang presyo ng gasolina.
Bahagi ang nasabing programa ng mas malawak na hakbang ng pamahalaan upang suportahan ang sektor ng transportasyon at mapanatili ang serbisyo sa mga komunidad sa gitna ng pabago-bagong presyo ng langis.
