Nanawagan ang Alyansa Tigil Mina (ATM) sa pamahalaan na repasuhin ang kasalukuyang mining framework ng bansa at bigyang-pansin ang panukalang Alternative Minerals Management Bill (AMMB).
Sa inilabas na pahayag noong Earth Day, April 22, iginiit ng grupo ang pagbasura sa Philippine Mining Act of 1995, na ayon sa kanila ay hindi sapat sa pagprotekta sa kapaligiran at mga komunidad.
Tinawag din ng ATM ang Department of Environment and Natural Resources (DENR) na tugunan ang panawagan ng mga komunidad na tumututol sa malakihang pagmimina, kabilang ang mga lugar sa Nueva Vizcaya, Eastern Samar, Leyte, at Sibuyan Island sa Romblon.
Ayon kay Jaybee Garganera, patuloy na nananawagan ang mga komunidad sa paghinto ng operasyon ng pagmimina at kanselasyon ng mga kontrata sa kanilang mga lugar.
Dagdag ng grupo, posibleng magpatuloy ang tensyon sa pagitan ng mga mining company at host communities kung walang agarang aksyon mula sa pamahalaan, lalo na sa mga lugar na sensitibo sa kalamidad at may mataas na biodiversity.
Iminungkahi ng ATM na isama sa AMMB ang pagtatalaga ng mga “no-go zones” para sa pagmimina, kabilang ang mga watershed, protected areas, agricultural lands, at kagubatan, pati na ang pagpapalakas ng karapatan ng mga katutubo at lokal na komunidad sa pagdedesisyon sa mga proyektong pagmimina.
Ayon sa grupo, layunin ng panukalang batas na matiyak na ang pakinabang mula sa yamang mineral ng bansa ay mapupunta sa mga Pilipino, kasabay ng pangangalaga sa kapaligiran at kabuhayan ng mga komunidad.
Discussion about this post