Naiuwi ng Romblomanong filmmaker na si Ryan Machado ang Best Director award para sa pelikulang “Raging” sa ginanap na 23rd Asian Film Festival sa Rome, Italy, isang pagkilala na nagpapakita ng patuloy na pag-angat ng pelikulang Pilipino sa international stage.
Ang taunang film festival sa Rome ay nagsisilbing plataporma para sa mga pelikulang Asyano sa Europa, kung saan tampok ang iba’t ibang kwento mula sa rehiyon.
Tampok sa pelikulang “Raging,” na pinagbidahan ni Elijah Canlas, ang kwento ng isang kabataang humaharap sa trauma at pang-aabuso sa isang rural na komunidad, na tumatalakay sa mga isyu ng karahasan at pagkalalaki.
Sa kanyang pahayag, nagpasalamat si Machado sa natamong parangal at inialay ito sa kanyang production team at sa mga taga-Sibuyan, Romblon kung saan hinugot ang inspirasyon ng pelikula. Aniya, nagsimula ang proyekto mula sa personal na karanasan at layuning talakayin ang mga sensitibong isyu sa komunidad.
Idinagdag pa niya na ang pagkilalang ito ay hindi lamang para sa kanya kundi para sa buong grupo na tumulong sa pagbuo ng pelikula, at nagsisilbing inspirasyon upang ipagpatuloy ang paggawa ng mga kwentong may lalim at kabuluhan.
Tinanggap naman ni Donna Feliciano-Gatmaytan, Deputy Head of Mission ng Embahada ng Pilipinas sa Italy, ang parangal sa ngalan ni Machado.
Ang “Raging” ay isa sa apat na pelikulang itinampok sa Filipino Day ng festival noong Abril 8 sa Cinema Farnese sa Rome, kasama ang iba pang pelikulang Pilipino tulad ng “Republika ng Pipolipinas” ni Renee Dimla, “Magellan” ni Lav Diaz, at “Moonglow” ni Isabel Sandoval.
