Ipinahayag ng Department of Social Welfare and Development o DSWD na nagsimula na silang magpatupad ng proseso para alisin ang mga dobleng entry ng mga benepisyaryo sa Pantawid Pamilyang Pilipino Program (4Ps).
Ito ay kasunod ng pagkakalantad sa isang ulat ng Commission on Audit (COA) na nagpapakita na umabot sa P7 milyon ang sobrang pagbabayad ng ahensya mula 2020 hanggang 2021 dahil sa mga dobleng entry sa programa ng 4Ps.
Ayon kay DSWD Assistant Sec. Romel Lopez, kasalukuyan nang isinasagawa ng ahensya ang prosesong validation ng datos kasama ang National Household Targeting Office para tukuyin ang mga pamilyang tinukoy ng COA.
Sa kasalukuyang proseso ng pagsusuri, nabatid na sa 316 na pamilyang ininspeksyon, 186 sa kanila ang may mga dobleng entry sa programa ng 4Ps. Muling binigyang diin ni Lopez na agad na aaksyunan ang pag-alis ng mga dobleng entry upang maiwasan ang overpayment.
Ayon sa mga ulat ng COA mula sa 2020 at 2021, naitala na umabot sa 368 ang bilang ng mga pamilyang may dobleng entry.
