Posibleng makaranas ang lalawigan ng Romblon ng tuloy-tuloy na pag-ulan hanggang Linggo (July 12) bunsod ng Habagat na pinalalakas ng Bagyong Inday, ayon sa pinakahuling weather advisory ng Philippine Atmospheric, Geophysical and Astronomical Services Administration (PAGASA).
Sa inilabas na Weather Advisory No. 14, kabilang ang Romblon sa mga lugar na inaasahang makatatanggap ng 50 hanggang 100 milimetro ng ulan mula ngayong gabi hanggang July 10, gayundin sa panahon ng July 10 hanggang July 11 at July 11 hanggang July 12.
Nagbabala ang PAGASA na maaaring mas mataas pa ang dami ng ulan sa mga bulubundukin at matataas na lugar at posibleng lumala ang epekto nito dahil sa mga naunang pag-ulan. Dahil dito, pinapayuhan ang mga lokal na pamahalaan at publiko na maging alerto sa posibleng pagbaha at pagguho ng lupa, lalo na sa mga lugar na madaling maapektuhan ng mga naturang panganib.
Samantala, bahagyang humina ang Bagyong Inday habang mabagal itong kumikilos sa karagatan silangan ng Northern Luzon. Huling namataan ang sentro nito, alas-10:00 ng gabi ng July 9, sa layong 740 kilometro silangan ng Calayan, Cagayan, taglay ang lakas ng hanging 155 kilometro kada oras at pagbugsong aabot sa 190 kilometro kada oras.
Bagama't walang nakataas na Tropical Cyclone Wind Signal sa Romblon, patuloy na pinalalakas ng bagyo ang Habagat na siyang nagdudulot ng malalakas na pag-ulan sa malaking bahagi ng kanlurang bahagi ng bansa, kabilang ang MIMAROPA.
Nagbabala rin ang PAGASA sa mga mangingisda at maliliit na sasakyang pandagat na umiwas muna sa paglalayag sa karagatan ng Romblon dahil inaasahang aabot sa 3.0 metro ang taas ng mga alon. Pinapayuhan ang mga operator ng mga motorbanca at iba pang katulad na sasakyang pandagat na mag-ingat o ipagpaliban muna ang paglalayag kung maaari.
Patuloy namang hinihikayat ng PAGASA ang publiko na subaybayan ang mga susunod na weather bulletin at mga abiso mula sa mga lokal na disaster risk reduction and management offices para sa napapanahong impormasyon hinggil sa lagay ng panahon.
Discussion about this post