Ipinakita ng Romblon State University (RSU) ang First 1,000 Days Continuum Framework nito sa ginanap na 52nd National Nutrition Month Regional Launching noong July 7 sa Odiongan, bilang bahagi ng pagsusulong ng wastong nutrisyon para sa mga ina at bata.
Sa kanyang presentasyon, ipinaliwanag ni Maria Josefa Punongbayan, pinuno ng Strategic Communications Office ng RSU, na nakabatay ang framework sa tatlong magkakaugnay na haligi—Child Care, Parent Care, at University Care.
Ayon kay Punongbayan, naniniwala ang unibersidad na hindi lamang ang mga bata ang dapat pagtuunan ng pansin upang malabanan ang malnutrisyon, kundi maging ang mga magulang at ang paglikha ng isang family-friendly na kapaligiran sa loob ng pamantasan.
“Our problems in nutrition persist because we address these pillars separately or inconsistently. Through the First 1,000 Days Continuum Framework, we hope to address the needs not only of children but also of parents and the university community,” ani Punongbayan.
Ibinahagi rin niya na ipinatutupad ng RSU ang iba't ibang programang sumusuporta sa mga buntis na estudyante at empleyado, gayundin ang mga family-friendly campus policies na naglalayong pangalagaan ang kapakanan ng mga pamilya sa loob ng unibersidad.
Makikipagtulungan din ang RSU sa mga ahensya ng pamahalaan at partner institutions sa pamamagitan ng extension program nitong Ladies for a Cause upang higit pang mapalakas ang mga programa para sa maternal at child nutrition gamit ang multisectoral na pamamaraan.
Sa mensahe naman ni RSU President Dr. Merian P. Catajay-Mani, na binasa ni Punongbayan, muling pinagtibay ng unibersidad ang suporta nito sa mga ina at pamilya sa unang 1,000 araw ng buhay ng isang bata.
“Life's greatest success begins in a mother's arms. When we invest in a child's first 1,000 days, we are not just nurturing one life. We are building the foundation of the community that the child will serve one day,” ayon sa mensahe ng pangulo ng RSU.
Kinikilala ng mga health experts ang unang 1,000 araw—mula sa pagbubuntis hanggang sa ikalawang kaarawan ng bata—bilang pinakamahalagang yugto para sa pisikal na paglaki, pag-unlad ng utak, at pangmatagalang kalusugan. Sa panahong ito, mahalaga ang wastong nutrisyon at pangangalaga upang maiwasan ang malnutrisyon at masuportahan ang buong potensyal ng isang bata.
Discussion about this post