Mabibigyan ng pagkakataon ang mga estudyante ng Romblon State University (RSU) na sumailalim sa internship at industry immersion sa Clark Freeport Zone matapos lagdaan ang isang memorandum of agreement (MOA) sa pagitan ng Clark Investors and Locators Association (CILA), 22 state universities and colleges (SUCs), at Commission on Higher Education (CHED) noong July 9.
Kabilang ang RSU sa 22 SUCs na nasa cluster na pinangangasiwaan ni CHED Commissioner Michelle Aguilar-Ong. Ang Pampanga State University (PamSU) ang magsisilbing lead o focal institution sa pagpapatupad ng programa.
Nilagdaan ang kasunduan nina CILA President Ernesto Gorospe, PamSU President Enrique Baking, at CHED Commissioner Michelle Aguilar-Ong.
Sa ilalim ng kasunduan, magkakaroon ng access ang mga kalahok na estudyante sa mga kumpanyang nakabase sa Clark Freeport Zone, kabilang ang mga nasa sektor ng semiconductor, electronics, logistics, at iba pang industriya. Ang PamSU ang mangangasiwa sa internship placement, supervision, accommodation, at cultural immersion ng mga ipadadalang estudyante.
Ayon sa CHED, layunin ng programa na mabigyan ng pagkakataon ang mga estudyante mula sa mga lalawigang may limitadong industriya, kabilang ang Romblon, na magkaroon ng aktuwal na pagsasanay sa mga pangunahing kumpanya sa bansa at mapalawak ang kanilang oportunidad sa trabaho matapos ang pag-aaral.
Batay sa datos ng Clark Development Corporation, may humigit-kumulang 1,350 locators at 151,000 manggagawa ang kasalukuyang nasa Clark Freeport Zone.
Ang programa ay magsisilbing pilot implementation ng panukalang national policy para sa local internships at student exchange programs. Idodokumento at susuriin ng CHED ang resulta ng implementasyon bilang batayan sa posibleng pagpapatupad nito sa buong bansa.
Discussion about this post