Isang 36-anyos na lalaki na itinuturing na high-value individual (HVI) sa ilegal na droga ang inaresto ng mga awtoridad sa isinagawang buy-bust operation sa kahabaan ng national road sa Barangay Gabawan, Odiongan bandang alas-10:00 ng gabi noong July 10.
Kinilala ng Romblon Police Provincial Office (PPO) ang suspek sa alyas na “Ron,” walang trabaho, may live-in partner, at residente ng Barangay Tumingad, Odiongan.
Ayon sa pulisya, matagumpay na nakabili ang poseur-buyer ng isang sachet ng hinihinalang shabu sa halagang ₱1,000, gamit ang dalawang tunay na ₱500 bill bilang buy-bust money.
Matapos ang transaksyon, agad na inaresto ang suspek at nakumpiska pa mula sa kanyang pag-iingat ang dalawa pang sachet na naglalaman ng hinihinalang shabu, isang pakete ng sigarilyo, isang Yamaha Aerox na motorsiklo, at susi nito.
Tinatayang may kabuuang bigat na 1.5 gramo at tinatayang ₱10,200 ang halaga ng mga nakumpiskang hinihinalang shabu, batay sa Dangerous Drugs Board (DDB) valuation.
Kasalukuyang nasa kustodiya ng Odiongan Municipal Police Station ang suspek at ang mga nakumpiskang ebidensya habang inihahanda ang pagsasampa ng kasong paglabag sa Sections 5 at 11, Article II ng Republic Act No. 9165 o ang Comprehensive Dangerous Drugs Act of 2002, sa pamamagitan ng inquest proceedings.
Discussion about this post