Bagaman nakakatatlong buwan pa lang sa puwesto bilang House Speaker itong si Taguig Representative Alan Peter Cayetano, pero tila nais nang palutangin ng mga alipores niya na siya ang pinakamahusay na lider at dapat manatiling pinuno ng mga kongresista hanggang matapos ang termino ni President Mayor Digong Duterte.
Kung tutuusin, wala namang masama kung sa tingin ng mga alipores niya na mahusay siyang lider at dapat maging pinuno ng Kamara kahit pa forever. Pero ang masama, may kasunduan siyang pinasok na maghahati sila ng termino bilang Speaker ni Marinduque Rep. Lord Allan Velasco, at alam ito mismo ni President Mayor Digong.
Para sa mga hindi nakakaalam o gustong kalimutan ang kasunduan, unang 15 buwan na uupong Speaker si Cayetano (na nagsimula nitong July at matatapos sa October 2020), at pagkatapos ay si Velasco naman hanggang sa nalalabing termino ni Duterte (sa June 2022). Pero siyempre, ang tunay na Lord lang ang nakakaalam kung masusunod ang kasunduan. Aba'y malay ba natin kung ano ang mangyayari sa hinaharap?
Pero nang lumabas ang pinakahuling survey ng Pulse Asia tungkol sa trust at approval ratings ng mga pinakamatataas na opisyal ng bansa, aba'y parang mga batang naglundagan ang mga alipores ni Cayetano nang lumitaw na mas mataas ang marka niya kaysa kay Vice President Leni Robredo.
Sa approval o nasisiyahan sa trabaho ng mga opisyal, si President Mayor Digong ang may pinakamataas na 78 percent, sunod si Senate President Tito Sotto na 72 percent, pangatlo si Cayetano na may 64 percent, pang-apat si Rodredo na may 50 percent, at huli si Supreme Court Chief Justice Lucas Bersamin na may 42 percent.
Sa trust rating o tiwala, 74 percent si Duterte; 66 si Sotto; 62 si Cayetano; 46 si Robredo at 34 si Bersamin.
Ang naturang rating ay para sa nakaraang tatlong buwan ng panunungkulan ng mga lider. Si Robredo mga tsong eh nagsimulang maging pangalawang pangulo matapos manalo noong 2016 elections, kung saan tinalo niya si Cayetano; at si Cayetano, nagsimula lang maging Speaker noong July lang matapos ang umaatikabong pakiusapan. Kaya naman walang pagkukumparahan kung tumaas ba ang kaniyang ratings o hindi.
Bukod doon, dapat tandaan ng mga alipores ni Cayetano na magkaiba ang trabaho ng vice president at House speaker. Kung naniniwala siya at ang kaniyang mga alipores na may pinagkakatiwalaan siya ng mga tao at mas natutuwa sa kaniyang trabaho, aba'y bakit siya natalong vice presidential candidate ni President Mayor Digong? Naungusan pa nga siya ni dating Sen. Bongbong Marcos sa dami ng boto.
Kung napapansin man ng mga tao ang Kamara ngayon, hindi iyon dahil kay Cayetano kung hindi dahil sa mga House leader tulad ng mga committee chairmen na nagsasagawa ng imbestigasyon at nagsasalita sa iba't ibang isyu tulad ng problema sa transportasyon. May narinig ka bang malasakit mula kay Cayetano sa kawawang kalagayan ngayon ng mga pasahero? Baka sa pagdepensa ng kanilang pork barrel funds na nasilip ng mga senador meron.
Sa mga susunod na linggo mga tsong, hihimayin na naman ng Senado ang panukalang budget sa 2020, at tiyak na maglalabasan na naman ang mga sinasabing pork barrel funds na umano'y isinisingit ng liderato ng Kamara para palakihin ang pondo ng mga kongresista.
Tanong tuloy ng isa nating kurimaw, panuhol kaya ni Cayetano na bigyan ng mas maraming pondo ang mga kongresista para magpapogi at sumama sa mga kunwaring mananawagan na huwag nang kilalanin ang term sharing kay Velasco para siya na lang ang maging Speaker hanggang matapos ang termino ni Duterte? Abangan.
Tandaan: Ang tao'y nilalang na politiko at madalas ang politiko'y nanlilinlang ng tao!
(Twitter: follow@dspyrey)
