Para maiba naman, mag-ala Marites muna tayo, aba’y marami talagang malalaman tungkol kina Presidential candidate Senator Ping Lacson at running mate niyang si Senate President Tito Sotto kapag pinanood ang colab vlog nina Ciara Sotto at Iwa Moto.
Sa isang parte ng vlog, may thumbs up-thumbs down portion kung saan sasagot ang dalawang panggiyerang pinuno ng bayan kung sino sa kanila ang nakaranas na ng sitwasyon na sasabihin nina Ciara at Iwa.
Isa nga rito ang tanong kung sino kina Sen. Ping at Tito Sen ang nakaranas na maging broken hearted noong kabataan nila.
Nag-thumbs down si Tito Sen, at laking gulat niya nang makitang nag-thumbs up ang kaniyang standard bearer na si Sen. Ping.
Tinanong ni Ciara ang kaniyang ama kung bakit hindi ito nakaranas na mabigo sa pag-ibig? Simple ang natatawang sagot ng “The One” na Vice Presidential bet, “Hindi ako nanliligaw nang walang gusto sa akin.”
“Kapag nagpakita ng motibo nililigawan ko,” natatawang sabi ni Tito Sen, sabay sabi na gusto niyang malaman kung papaanong naging broken hearted si Sen Ping.
Kuwento ng senador, nung nasa kolehiyo siya at pumasok sa PMA sa Baguio, mayroon siyang kasintahan sa Maynila. Pagsusulatan ang naging daan ng kanilang komunikasyon at itinatabi raw niya ang napakaraming sulat nito.
Nang magkaroon ng pagkakataon na pansamantalang makalabas ng PMA at makauwi ng Maynila, sinorpresa niya ang nobya at umuwi siya sa Maynila. Pero siya ang nasorpresa nang makita niya ang nobya na may sumundo na ibang lalaki sa pinagtatrabahuhan nitong bangko.
“Obvious naman sa kilos na boyfriend [ang sumundo]. Ginawa ko na lang nagpakita na lang ako para wala nang explanation,” kuwento niya.
Pagbalik daw niya sa PMA, kinuha niya ang lahat ng sulat ng babae, at maging ang larawan nito at kaniyang sinunog.
“After that tapos na. Wala na ‘kong naramdaman [sakit],” anang senador. “Tapos eto pa tumatawag pa, hindi ko na talaga kinausap.”
Bumilib sina Ciara at Iwa sa paraan ni Sen. Ping kung how to move on sa nangyaring sitwasyon.
Nagbiro rin ang senador na nang maging PNP chief siya, sinabi niya sa babae na nagkaroon sana ito ng mister na PNP kung hindi siya ipinagpalit sa iba.
Kaya payo nina Iwa at Ciara sa mga nanood ng kanilang vlog, huwag sasayangin at ipagpapalit sa iba sina Ping at Tito na tumatakbong presidente at bise presidente.
Pero kahit hindi nakatuluyan ni Sen. Ping ang babae, mukhang si Mam Alice de Perio ang sadyang nakatadhana para sa kaniya na hindi siya iniwan sa anumang pagsubok na pinagdaanan niya sa buhay.
Nagkaroon sila ng apat na anak, at sa susunod na taon ay ipagdiriwang na nila ang kanilang golden wedding anniversary.
Tandaan: Ang tao'y nilalang na politiko at madalas ang politiko'y nanlilinlang ng tao! (Twitter: follow@dspyrey)
