Isinagawa sa bayan ng Alcantara ang Breast and Cervical Cancer Awareness Campaign na may temang “Babae, Mahalaga Ka” upang palawakin ang kaalaman ng mga kababaihan tungkol sa pag-iwas, maagang pagtukoy at paggamot sa breast at cervical cancer.
Nakiisa sa programa ang Department of Health (DOH), Provincial Health Office, Romblon Provincial Hospital (RPH), mga doktor at Municipal Health Officers (MHO) mula sa iba’t ibang bayan sa lalawigan.
Bilang bahagi ng aktibidad, nagsagawa ng mga libreng seminar tungkol sa breast at cervical cancer, kabilang ang kahalagahan ng maagang pagpapasuri at agarang pagpapagamot.
Nagkaloob din ng iba’t ibang serbisyong pangkalusugan, kabilang ang PhilHealth YAKAP registration, HIV testing at human papillomavirus (HPV) vaccination.
Samantala, nanumpa ang mga doktor at kinatawan ng iba’t ibang tanggapan sa lalawigan bilang pagpapahayag ng kanilang pangakong patuloy na palakasin ang mga programa at serbisyong pangkalusugan para sa mga mamamayan.
Sa pagtatapos ng programa, nagpasalamat ang mga kinatawan ng DOH at si Alcantara Mayor Dr. Riza F. Galicia Pamorada sa lahat ng lumahok at tumulong sa pagsasagawa ng aktibidad.
Hinikayat din nila ang mga dumalo na isabuhay ang mga natutuhan at patuloy na bigyang-halaga ang pangangalaga sa sariling kalusugan.
Ayon kay Pamorada, nakatutulong ang mga ganitong aktibidad sa pagpapalawak ng kamalayan tungkol sa kalusugan ng kababaihan at sa kahalagahan ng maagang pagpapasuri upang matukoy at magamot agad ang mga sakit.
