Patay ang isang 45-anyos na lalaki matapos umano siyang barilin ng kanyang nakababatang kapatid na isang barangay kagawad sa Barangay Buenavista, Looc, Romblon, bandang 6:30 ng gabi nitong September 23, 2026.
Ayon sa Looc Municipal Police Station (MPS), kapwa magkapatid at residente ng nasabing barangay ang biktima at 44-anyos na suspek.
Sa ulat ng pulisya, nagkaroon umano ng pagtatalo ang magkapatid kaugnay sa paggamit ng motorsiklo ng isang taong inutusan nilang bumili ng yelo.
Lumalabas sa unang imbestigasyon ng kapulisan na habang nagtatalo ang dalawa ay sinaktan at tinangkang saksakin ng biktima ang suspek hanggang sa makuha umano nito ang baril na sukbit ng biktima. Dito na gumanti ang suspek at nabaril ang biktima sa iba't ibang bahagi ng katawan.
Nagtamo ang biktima ng ilang tama ng bala sa iba't ibang bahagi ng katawan, kabilang ang kaliwa at kanang harapang bahagi ng katawan, kaliwang kamay at kanang tuhod.
Narekober sa crime scene ang anim na basyo ng bala at tatlong fired bullets na pawang caliber .45.
Sa isinagawang crime scene processing ng Romblon Provincial Forensic Unit, narekober mula sa biktima ang dalawang bolo, kabilang ang isang may scabbard, at isang caliber .38 na baril na may isang bala na nakasukbit sa kanyang bewang.
Narekober din ang cellphone, dalawang sinturon, lighter, dalawang panyo at ₱260 cash.
Patuloy namang hinahanap ng pulisya ang baril na umano’y ginamit ng suspek sa pamamaril.
Samantala, inihahanda na ng Looc MPS ang kasong homicide laban sa suspek, habang nagpapatuloy ang imbestigasyon sa buong pangyayari.
