Inaasahang magkakaroon na ng lokal na suplay ng itlog ang bayan ng Banton matapos ipagkaloob ng Department of Agriculture–Special Area for Agricultural Development (DA-SAAD) MIMAROPA ang ₱1.48-milyong Ready-to-Lay Chicken Egg Production Project sa Masikap Farmers Association 2018 sa Barangay Tan-ag noong October 13.
Sa ilalim ng proyekto, tumanggap ang samahan ng 700 ready-to-lay na manok, mga patuka, kulungan, egg trays, bitamina, gamot, timbangan at iba pang kinakailangang kagamitan para sa produksyon ng itlog.
Ayon kay Mayor Milagros Faderanga, mataas ang presyo ng itlog sa Banton dahil nagmumula pa sa ibang lugar ang suplay, kabilang ang Lucena, Tablas Island at Oriental Mindoro.
“Napakalaking tulong ang proyektong ito kasi ang itlog dito ay mahal kasi galing ’yon sa ibang lugar. For the first time, dito sa Banton ay magkakaroon kami ng ganyan. Salamat at mayroon na sa Tan-ag,” ani Faderanga.
Umaasa ang alkalde na makatutulong ang lokal na produksyon upang magkaroon ang mga residente ng mas sariwang itlog at posibleng mas mababang presyo.
Sinabi naman ni Masikap Farmers Association 2018 President Retchel F. Faa na malaking tulong sa kanilang samahan ang proyekto dahil nagbibigay ito ng pagkakataong kumita, magkaroon ng dagdag na mapagkukunan ng pagkain at matuto sa pamamahala ng produksyon at pagbebenta.
“Mapalad po kami na napili bilang benepisyaryo at nakatatanggap ng mga suporta na hindi namin kayang bilhin. Bukod sa mga input, malaki rin ang naitutulong sa amin ng mga training dahil higit pa kaming natututo,” ani Faa.
Kabilang sa mga hamon ng samahan ang lokasyon ng communal farm sa mataas na bahagi ng barangay at kawalan ng maayos na daanan. Bilang tugon, maghahati-hati ang mga miyembro sa mga gawain at magtatalaga ng caretaker upang tutukan ang pangangalaga sa mga manok.
Bukod sa egg production, nagtatanim din ang samahan ng balinghoy, mais at iba pang pananim sa lupang malapit sa manukan.
Ayon kay DA MIMAROPA Regional Executive Director at SAAD MIMAROPA Focal Person Atty. Christopher R. Bañas, inaasahang magsisilbing panimula ang proyekto sa pagpapalakas ng lokal na suplay ng itlog at pagbibigay ng karagdagang pagkakakitaan sa mga miyembro ng samahan. (PR)
