Itinanghal na kampeon si National Master (NM) Jasper Faeldonia ng Odiongan, Romblon sa katatapos na 1st Dr. GM Eugene Torre FIDE Standard Open Chess Tournament na ginanap sa Marikina Sports Center noong Agosto 30–31, 2026.
Nagtala si Jasper ng 5.5 puntos matapos ang anim na round ng Swiss System, mula sa limang panalo at isang tabla. May FIDE Standard rating ang torneo at ginamitan ng 60-minutong oras na may tatlong segundong dagdag kada galaw. Umuwi siya na may ₱20,000 premyong salapi.
Kapantay ni Jasper sa 5.5 puntos sina Jeremy Marticio ng Cabuyao, Laguna at ang kanyang nakababatang kapatid na si Arena International Master (AIM) Jerick Faeldonia ng Odiongan, Romblon. Nanguna si Jasper batay sa tie-break points, habang pumangalawa si Marticio at pangatlo si Jerick.
Sa huling round, tinalo ni Jasper si National Master Keith Adriane Ilar matapos ang 65 galaw gamit ang King's Indian Defense sa Board 1. Samantala, tinalo ni Jerick si International Master Ricardo de Guzman matapos ang 75 galaw gamit ang Torre Attack sa Board 2. Tinalo naman ni Marticio si Kings Lanz Pamplona matapos ang 28 galaw gamit ang Trompovsky Opening sa Board 3.
Nakatanggap si Marticio ng ₱15,000 para sa ikalawang puwesto, habang ₱10,000 naman ang premyo ni Jerick para sa ikatlong puwesto.
Lumahok sa torneo ang 223 manlalaro, kabilang ang apat na International Master, tatlong National Master at 18 Arena Master mula sa iba't ibang lugar.
Nakumpleto naman ang Top 10 nina NM Keith Adriane Ilar sa ika-4 na puwesto, IM Ronald Bancod sa ika-5, Jian Carlo Rivera sa ika-6, AIM Zeyus Kyle Del Mundo sa ika-7, Quarl Maverick Vera Cruz sa ika-8, Denniel Penafiel sa ika-9, at Jan Renzo Ochave sa ika-10, na pawang nagtala ng tig-5.0 puntos.
Inorganisa ang torneo ni Jun Enage, sa suporta nina Marikina City Mayor Maan Teodoro at Cong. Marcy Teodoro. Nagsilbing Chief Arbiter si International Arbiter, FIDE Trainer at FIDE Master Rudy Ibanez.
Patuloy ding nakatanggap ng suporta sina Jasper at Jerick mula kay Romblon Governor Trina Firmalo-Fabic sa kanilang mga torneo.
Discussion about this post