Natagpuang patay ang isang dolphin sa baybayin ng Sitio Bunga, Barangay Danao Norte, Santa Fe, Romblon nitong Huwebes ng umaga, October 15, isang araw matapos itong mailigtas mula sa mababaw na bahagi ng dagat.
Walang nakitang sugat sa katawan ng dolphin, ngunit hindi pa kumpirmado ang sanhi ng pagkamatay nito.
Pinaghihinalaang maaaring may kaugnayan sa stress o matinding init ng panahon ang pagkakahiwalay nito sa pangkat o pod nito.
Unang nakita ang dolphin na lumalangoy sa mababaw na bahagi ng dagat sa Sitio Sabang noong Miyerkules ng umaga, Oktubre 14.
Rumesponde ang mga bantay-dagat at binantayan ito hanggang hapon bago ibinalik sa mas malalim na bahagi ng dagat pagsapit ng gabi.
