Hinikayat ni Sangguniang Panlalawigan (SP) Member Irene Morgado ang mga kabataan, magsasaka, mangingisda at iba pang sektor na sumali sa mga kooperatiba upang makatulong sa pagpapalago ng kabuhayan at ekonomiya ng mga pamilya sa Romblon.
Sa isang panayam, sinabi ni Morgado na mahalagang mahikayat ang mas maraming mamamayan na makilahok sa mga kooperatiba dahil nakaaapekto ito sa bilis ng pag-unlad ng ekonomiya ng komunidad.
Ayon sa kanya, kapag mas maayos ang kalagayang pang-ekonomiya ng bawat pamilya, mas magkakaroon sila ng kakayahang mapag-aral ang kanilang mga anak at makapag-ambag sa komunidad.
Binigyang-diin din niya na ang kabuhayang napalago sa pamamagitan ng kooperatiba ay maaaring maipasa sa susunod na henerasyon, kaya mahalagang isulong ang pagpapanatili nito sa pangmatagalan.
Umaasa rin si Morgado na magsisilbing inspirasyon sa kabataan ang pagkilala sa kakayahan ng mga taga-Romblon sa larangan ng kooperatiba at mahikayat silang tuklasin ang mga oportunidad na dulot nito.
Samantala, sinabi ni Morgado na paghahandaan ng lalawigan ang pagiging host ng susunod na Regional Cooperative Congress sa susunod na taon, na inaasahang dadaluhan ng 500 hanggang 600 kalahok.
Ayon sa kanya, makatutulong ang pagdaraos ng aktibidad sa Romblon upang maipakilala sa mga kalahok mula sa iba’t ibang bahagi ng bansa at sa mas malawak na publiko ang mga pasyalan, pagkain at iba pang maipagmamalaki ng lalawigan.
Wala pang itinakdang petsa para sa aktibidad. Ayon kay Morgado, sa Marinduque gaganapin ang MIMAROPA 4th Cooperative Congress ngayong buwan na dadaluhan ng mahigit 100 kalahok mula sa lalawigan ng Romblon.
