Dalawang katao ang nasugatan matapos masangkot sa banggaan ang isang pickup truck at dalawang motorsiklo sa National Road malapit sa Barangay Hall ng Barangay Tumingad, Odiongan, Romblon, bandang alas-10:30 ng umaga nitong October 16, 2026.
Batay sa paunang imbestigasyon ng Odiongan Municipal Police Station (MPS), sangkot sa insidente ang isang Toyota Hilux pickup truck, Honda Beat 110 at Euro 125 na motorsiklo.
Ayon sa pulisya, patungong Barangay Tumingad at San Andres ang pickup truck, na sinusundan ng Euro 125. Kasabay nito, bumibiyahe naman sa kabilang direksiyon ang Honda Beat na may sakay na dalawang back rider, kabilang ang isang tatlong taong gulang na bata.
Pagdating sa tapat ng barangay hall, umano’y nag-overtake ang driver ng Euro 125 sa pickup truck ngunit nawalan ng kontrol sa motorsiklo, na iniulat na dahil sa mabilis na pagpapatakbo. Sumasagi umano ang motorsiklo sa kaliwang likurang bahagi ng pickup truck bago lumihis sa kabilang lane at tumama sa kaliwang paa ng babaeng back rider ng Honda Beat.
Dahil sa insidente, nagtamo ng mga pinsala sa iba’t ibang bahagi ng katawan ang 19-anyos na driver ng Euro 125. Agad siyang isinugod ng mga tauhan ng Municipal Disaster Risk Reduction and Management Office (MDRRMO) sa Romblon Provincial Hospital para sa pagpapagamot.
Nagtamo rin ng pinsala sa kaliwang paa ang 37-anyos na babaeng back rider ng Honda Beat, ngunit iniulat na tumanggi itong magpagamot sa ospital.
Walang iniulat na nasaktan sa mga sakay ng pickup truck at sa iba pang sakay ng Honda Beat, kabilang ang tatlong taong gulang na bata.
Dinala sa Odiongan MPS ang Euro 125 para sa dokumentasyon at kaukulang disposisyon, habang naibalik sa kani-kanilang may-ari ang pickup truck at Honda Beat.
Patuloy na iniimbestigahan ng pulisya ang insidente upang matukoy ang buong pangyayari sa likod ng banggaan.
Paalala naman ng Romblon Police Provincial Office sa mga motorista na sumunod sa mga patakaran sa kalsada, panatilihin ang ligtas na bilis at mag-ingat sa pag-overtake upang maiwasan ang mga aksidente.
