Sinimulan sa bayan ng Odiongan ang MIMAROPA Initiative Spay, Castration and Anti-Rabies Campaign sa Romblon upang magbigay ng libreng serbisyong beterinaryo at makatulong sa pagpuksa ng rabies sa rehiyon.
Ayon kay Dr. Joseph Victoria, provincial veterinarian ng Marinduque, layunin ng programa na matulungan ang mga pet owner sa pamamagitan ng libreng serbisyong beterinaryo at mapalakas ang mga hakbang laban sa rabies.
“Ang main goal nito ay masugpo ang pamiminsala ng rabies sa populasyon ng human at animal at tuluyang wakasan ang salot na ito hindi lamang sa bawat probinsya kundi sa buong MIMAROPA region” pahayag ni Dr. Victoria
Inilunsad ang inisyatiba noong 2015 matapos ang matagumpay na paglipol sa rabies sa Marinduque. Pansamantala itong natigil dahil sa COVID-19 pandemic at paglaganap ng African Swine Fever (ASF), bago muling ipagpatuloy noong 2021.
Para sa kasalukuyang kampanya sa Romblon, nakatakdang magsagawa ng libreng spay at neuter operations sa mga bayan ng Odiongan, Calatrava, Looc, at Alcantara.
Katuwang sa programa ang Department of Agriculture (DA), Bureau of Animal Industry (BAI), Department of Health–Center for Health Development MIMAROPA (DOH-CHD MIMAROPA), Research Institute for Tropical Medicine (RITM), Food and Agriculture Organization (FAO), at iba’t ibang pribadong organisasyon.
Nagpasalamat naman ang mga pet owner na nakinabang sa libreng serbisyo. Ayon kay Vivienne Formon, isang estudyante at fur parent na nagdala ng kaniyang alagang pusa, malaking tulong ang operasyon sa kalusugan ng kaniyang alaga at sa pagiging responsableng pet owner.
