Nagpaalala ang Department of Trade and Industry (DTI) Romblon sa mga negosyo na sumunod sa mga pamantayan at certification requirements ng kanilang mga produkto upang matiyak ang kalidad at kaligtasan ng mga ito para sa mga mamimili.
Kasunod ito ng isinagawang product standards monitoring ng DTI Romblon at mga Negosyo Center sa iba't ibang bahagi ng lalawigan noong Oktubre 14 at 15 bilang bahagi ng pagdiriwang ng National Standards Week at World Standards Day 2026.
Layunin ng aktibidad na palawakin ang kaalaman ng mga negosyo tungkol sa mga pamantayan ng produkto at hikayatin ang mga ito na sumunod sa mga umiiral na regulasyon.
Pinayuhan din ng DTI ang mga mamimili na suriin ang mga label, certification mark at impormasyong pangkaligtasan ng mga produkto bago bumili.
Ayon sa ahensiya, ang pagsunod sa mga pamantayan ng produkto at pagiging mapanuri sa pagbili ay nakatutulong sa pangangalaga sa kapakanan ng mga mamimili at pagtataguyod ng patas na kompetisyon sa negosyo.
