Muling magdaraos ng one-day chess tournament ang San Fernando Chess Club sa Oktubre 25, 2026, sa San Fernando Public Plaza sa bayan ng San Fernando, Romblon, bilang bahagi ng layuning malinang ang kakayahan ng mga batang chess player sa Sibuyan Island.
Magsisimula ang tournament proper alas-8 ng umaga at bukas ito sa lahat ng mga Sibuyanon na nais lumahok sa kompetisyon.
Ito na ang ikaapat na Sibuyan-wide chess tournament na isasagawa ng San Fernando Chess Club mula nang simulan nito ang naturang aktibidad noong 2025.
Bukod sa mga Sibuyan-wide at open tournament, nagsasagawa rin ang club ng mga maliliit na kompetisyon para sa mga miyembro nito.
Ayon kay Fabert “Nonong” Reyes, pangulo ng San Fernando Chess Club, layunin nilang makatulong sa pagpapaunlad ng kakayahan ng mga kabataang nag-aaral upang makasali sa mga chess competition sa paaralan, partikular sa bayan ng San Fernando.
Nais din ng grupo na makapagsanay at makapaghubog ng mga manlalaro na balang araw ay makakamit ang titulong chess master mula sa bayan ng San Fernando at sa buong isla ng Sibuyan.
Kabilang sa mga chess player na nagmula sa Sibuyan at nakilala sa mga pambansa at pandaigdigang kompetisyon sina dating National Master Dr. Jenny Mayor at Arena Grandmaster Joseph Galindo.
Para sa nalalapit na torneo, makakatanggap ang kampeon ng ₱3,000, habang ₱2,000 naman ang para sa ikalawang puwesto at ₱1,000 para sa ikatlong puwesto.
May premyong ₱500 ang fourth at fifth placers, habang ₱400 naman ang matatanggap ng sixth at seventh placers.
Magkakaroon din ng special awards para sa Top Female, Top Junior at Top Senior, na may tig-₱500 na premyo.
Ang mga interesadong lumahok ay maaaring makipag-ugnayan kina Fabert “Nonong” Reyes at Jojo Forcadas sa numerong 0927-511-5013. May registration fee na ₱200 ang bawat kalahok.
