Lalahok ang siyam na batang chess players mula sa iba’t ibang bayan ng Romblon sa Batang Pinoy 2026 na gaganapin sa Bacolod City sa Disyembre 12–18, 2026.
Ito ang unang pagkakataon na magpapadala ang Romblon ng chess team sa naturang kompetisyon na bahagi ng grassroots sports program ng Philippine Sports Commission (PSC).
Pangungunahan ng mga dating kinatawan ng Romblon sa Palarong Pambansa 2026 na sina Elijah Zaldivar Madeja, Grade 9 mula sa San Andres National High School, at Roda Gomez Ngo, Grade 7 mula sa Philippine Science High School–MRC, ang koponan. Kapwa lumahok sina Madeja at Ngo sa Palarong Pambansa na ginanap sa Agusan del Sur.
Kasama rin sa koponan sina Franche Adrianne Manito, Grade 6 ng Limon Sur Elementary School sa Looc; Andres Asuncion Maño Jr., Grade 4 ng Bunsoran Elementary School sa Ferrol; Kathryn Andrena Asuncion Maño, Grade 9 ng Ferrol National High School; Zach Davin Fetalino Familara, Grade 5 ng Budiong Elementary School sa Odiongan; Ralf Renz Cano, Grade 7 ng Alcantara National High School; Ryel Min Joon Cano, Grade 5 ng Bagsik Elementary School sa Alcantara; at Luben Vicente, Grade 8 ng Looc National High School.
Magsisilbing head coach ng koponan si Coach Genelyn Cano, habang si Nephtali Bantang ang magiging trainer na gagabay sa paghahanda ng mga atleta para sa kompetisyon.
Sasabak ang mga manlalaro sa tatlong chess categories: standard, rapid at blitz.
Nabuo ang paglahok ng koponan sa pamamagitan ng mga inisyatiba nina Governor Trina Alejandra Firmalo-Fabic, SP Member Bing Solis at Dr. Ramer Ramos, na magsisilbing head of delegation ng Romblon.
Ang Batang Pinoy ay isa sa mga grassroots sports program ng PSC na naglalayong matuklasan at malinang ang kakayahan ng mga batang atleta sa iba’t ibang panig ng bansa, kabilang ang mga kabataan mula sa malalayong komunidad.
Bukod sa chess, mayroon ding iba pang mga atletang kakatawan sa Romblon sa nasabing kompetisyon.
Patuloy namang humihingi ng suporta ang mga atleta at kanilang mga tagasuporta upang matustusan ang kanilang pagsasanay at paghahanda bago ang palaro.
