Arestado ang 38 katao sa pagsalakay ng pulisya sa isang sabungan sa Barangay Panangcalan, San Fernando, Romblon nitong hapon ng Linggo, Oktubre 18.
Isinagawa ang operasyon sa Sibuyan Amusement Center Corp. sa kahabaan ng National Road ng pinagsanib na puwersa ng San Fernando Municipal Police Station sa pamumuno ni Police Captain Elena Gebana at ng 3rd Platoon ng Romblon Provincial Mobile Force Company sa pamumuno ni Police Captain Alvin Rex Bangona.
Ayon sa Romblon Police Provincial Office, nagsagawa ng operasyon ang mga awtoridad matapos makatanggap ng ulat na umano’y nag-ooperate ang pasilidad nang walang balidong prangkisa at business permit.
Kabilang sa mga naaresto ang mga lalaki at babae, mula sa mga young adult hanggang senior citizen, na umano’y nagsisilbing teller, caretaker, llamador, handler, bettor at watcher.
Narekober din ng mga awtoridad ang mga ebidensiya at kagamitang may kaugnayan sa operasyon ng sabungan.
Isinagawa ang imbentaryo ng mga nakumpiskang bagay sa lugar habang nagpapatuloy ang imbestigasyon para sa posibleng pagsasampa ng kaso.
Ayon sa Romblon Police Provincial Office, bahagi ang operasyon ng kampanya nito laban sa ilegal na sugal sa lalawigan. Hinimok din ng pulisya ang mga operator ng mga pasugalan na kumuha ng kinakailangang permit at lisensya bago magsimula ng operasyon.
