Pormal na sinimulan ng Department of Health (DOH) sa bayan ng Romblon ang MIMAROPA-wide Measles-Rubella Supplemental Immunization Activity (MR-SIA) o “Ligtas Tigdas” campaign nitong Agosto 5 para sa mga batang edad anim (6) hanggang 59 buwan.
Pinangunahan ni DOH MIMAROPA Regional Director Rodolfo Albornoz, MD, ang paglulunsad ng kampanya at hinikayat ang mga magulang na pabakunahan ang kanilang mga anak.
“Kailangang tuloy-tuloy itong ating vaccination. Nandito tayo para masiguro at mahikayat ang ating mga magulang na mapabakunahan ang inyong mga anak,” ani Albornoz.
Binigyang-diin din niya na ang tigdas ay isang sakit na maaaring maiwasan sa pamamagitan ng bakuna.
“Sa ating mga magulang, hindi niyo kailangang lumayo dahil ang bakuna mismo ang lalapit sa inyo dahil meron tayong mga vaccination sites na malapit sa inyong lugar. Ang mga bakuna ay safe, effective at libre,” dagdag niya.
Samantala, sinabi ni Romblon Provincial Health Officer Dr. Winston Palasi na bagama't wala pang naitatalang kumpirmadong kaso ng tigdas sa lalawigan mula noong 2022, nananatiling mahalaga ang pagpapabakuna upang maiwasan ang posibleng pagbalik ng sakit.
Ang MR-SIA ay bahagi ng patuloy na programa ng pambansang pamahalaan sa ilalim ng administrasyon ni Pangulong Ferdinand R. Marcos Jr. upang mapataas ang immunity ng mga batang maaaring hindi nabigyan ng regular na bakuna laban sa tigdas at rubella.
Target ng kampanya na mabakunahan ang lahat ng kwalipikadong batang 6 hanggang 59 buwan, anuman ang kanilang naunang vaccination status, maliban kung may medical contraindication.
Ayon sa DOH, nakasalalay ang tagumpay ng kampanya sa pagtutulungan ng mga ahensya ng pamahalaan, mga lokal na pamahalaan, health workers, private medical practitioners, at iba pang katuwang sa komunidad upang maabot ang bawat kwalipikadong bata sa rehiyon.
