Nakipag-ugnayan na ang National Irrigation Administration (NIA) sa Department of Agriculture (DA), Department of the Interior and Local Government (DILG), at Department of Social Welfare and Development (DSWD) upang maihanda ang posibleng tulong sa mga magsasaka sakaling maapektuhan ang kanilang pananim at kabuhayan ng El Niño.
Ayon kay Engr. Maria Victoria Malenab Division Manager ng NIA MIMAROPA, nakipag-ugnayan na sila sa DA upang maihanay ang iskedyul ng paghahatid ng tubig-irigasyon sa mga programa ng ahensya, kabilang ang pamamahagi ng mga binhi.
Ipinaliwanag ng opisyal na mahalagang magtugma ang suplay ng tubig at ang paghahanda ng mga magsasaka, dahil hindi sapat ang patubig kung wala namang binhing maipupunla.
Nakipag-ugnayan din ang NIA sa DSWD upang alamin kung anong pinansyal na tulong ang maaaring maibigay sa mga magsasakang posibleng malugi o hindi makaani dahil sa tagtuyot.
Sa DILG naman, tinanong ng ahensya ang posibilidad ng alternatibong kabuhayan para sa mga magsasakang maaaring pansamantalang hindi makapagtanim ng palay.
Kasabay ng mga hakbang na ito, isinusulong din ng NIA ang crop diversification o pagpapalit ng pananim kung hindi na kayang suportahan ng natitirang tubig ang palay, na nangangailangan ng mas malaking suplay ng tubig kumpara sa ibang pananim gaya ng mais, munggo at sibuyas.
Gayunman, binigyang-diin ng NIA na mangangailangan ito ng koordinasyon sa iba pang ahensya upang matulungan ang mga magsasaka sa binhi at teknikal na kaalaman sa pagtatanim ng alternatibong pananim.
Layunin ng koordinasyon na maihanda ang mga posibleng suporta bago pa lumala ang epekto ng tagtuyot at mabawasan ang panganib na malugi ang mga magsasaka.
