Hinihikayat ng Philippine Science High School–MIMAROPA Region Campus (PSHS-MIMAROPA) ang mga kwalipikadong Grade 6 pupil na kumuha ng National Competitive Examination (NCE) para sa school year 2027-2028 upang magkaroon ng pagkakataong makapag-aral sa isang specialized science high school na may scholarship at iba pang suportang pinansyal.
Ayon kay Christine Jann R. Moscoso, pinuno ng National Competitive Examination Campaign Committee ng PSHS-MIMAROPA, kabilang sa mga benepisyo ng scholarship program ang buwanang stipend, libreng board and lodging, at posibleng tulong sa pamasahe para sa mga kwalipikadong mag-aaral na nangangailangan nito.
“Ang pinakanake-cater po natin ay ‘yung scholarship. Yung monthly stipend na ino-offer when they pass,” ani Moscoso sa October 7 episode ng Arangkada MIMAROPA, programa ng Philippine Information Agency (PIA) MIMAROPA sa pakikipagtulungan sa Radyo Pilipinas Palawan.
Sinabi ni Moscoso na may dormitory facilities ang paaralan para sa mga estudyanteng nagmumula sa malalayong lugar sa rehiyon, na may magkakahiwalay na dormitoryo para sa mga lalaki at babae.
“Meron po tayo free board and lodging, although there is just a very minimum amount na babayaran para sa kuryente,” aniya.
Mayroon ding abot-kayang pagkain sa canteen ng paaralan, kung saan maaaring makabili ng kumpletong pagkain na may kanin, ulam, gulay at panghimagas sa halagang ₱50.
Para naman sa mga kwalipikadong estudyanteng nahihirapang tustusan ang pamasahe, maaaring iendorso ng scholarship committee ang kanilang aplikasyon para sa transportation assistance.
Sa kasalukuyan, may 352 mag-aaral ang PSHS-MIMAROPA mula Grade 7 hanggang Grade 12. Tumatanggap din ang paaralan ng mga estudyante mula sa iba pang bahagi ng bansa, hindi lamang sa MIMAROPA.
Hinikayat ni Moscoso ang mga magulang na isaalang-alang ang oportunidad, lalo na para sa mga pamilyang may limitadong kakayahang pinansyal.
“Ine-encourage po namin ang mga magulang na pag-enrol-in ang kanilang mga anak dahil napakagandang chance na po ito. For low-income families, kung hindi talaga nila kayang mag-provide ng transportation, the scholarship committee can endorse them for transportation allowance,” ani Moscoso.
Para sa school year 2027-2028, maaaring mag-aplay sa NCE ang mga Grade 6 pupil hanggang November 7, 2026.
Kailangang may Grade 5 final grade na hindi bababa sa 85 porsiyento sa Math at Science ang mga aplikante. Para sa mga hindi nakaaabot sa nasabing grade requirement, maaari silang magsumite ng sertipikasyong kabilang sila sa top 10 percent ng kanilang klase.
Hindi rin dapat lalampas sa 15 taong gulang ang aplikante sa oras ng admission. Kabilang sa mga kailangang isumite ang Grade 5 report card at 1×1 litrato. Maaaring kumpletuhin online ang aplikasyon.
Bukod sa NCE para sa mga papasok sa Grade 7, nagsasagawa rin ang paaralan ng lateral admission examination, karaniwang tuwing Marso o Abril, para sa mga estudyanteng nais lumipat sa Grade 8 o Grade 9.
