Nagpahayag ng kalungkutan si San Fernando Mayor Fernando Marin matapos aprubahan ng nakararami sa Sangguniang Bayan ang resolusyong nag-eendorso sa mga aplikasyon ng Altai Philippines Mining Corporation (APMC) kaugnay ng Declaration of Mining Project Feasibility, mining operations, Miscellaneous Lease Agreement (MLA), at Tree Cutting Permit.
Sa kanyang pahayag, sinabi ni Marin na ang naging desisyon ng Sangguniang Bayan ay may kaugnayan sa kinabukasan ng bayan, pangangalaga sa kalikasan, at kapakanan ng mga susunod na henerasyon ng mga San Fernandohanon.
Ayon sa alkalde, naniniwala siyang ang mga usaping may kinalaman sa pagmimina ay nararapat na mapag-aralang mabuti, mapag-usapan nang bukas, at mabigyan ng pagkakataon ang mga mamamayan na maipahayag ang kanilang pananaw dahil sila ang direktang maaapektuhan ng proyekto.
Iginiit din ni Marin na mananatiling nakatuon ang kanyang administrasyon sa pangangalaga sa kalikasan at sinabi nitong rerepasuhin ng lokal na pamahalaan ang naturang resolusyon upang matiyak na ang mga susunod na hakbang ay naaayon sa Saligang Batas, umiiral na mga batas, at sa Comprehensive Land Use Plan ng bayan.
Sinabi rin ng alkalde na iginagalang niya ang karapatan ng mga mamamayan na gumamit ng mga legal na pamamaraan upang maipahayag ang kanilang posisyon at makilahok sa mga usaping may epekto sa kanilang komunidad.
Nauna rito, inaprubahan ng Sangguniang Bayan ng San Fernando ang resolusyong nag-eendorso sa aplikasyon ng APMC para sa Declaration of Mining Project Feasibility at mga kaugnay na aplikasyon ng kumpanya, habang nauna namang hindi inendorso ng Barangay Local Government Unit ng Barangay España ang panukalang proyekto.
Discussion about this post