Inanunsyo ni Pangulong Ferdinand R. Marcos Jr. ang pagpapalawak ng Unified Package for Livelihoods, Industry, Food, and Transport (UPLIFT) upang makapagbigay ng karagdagang ayuda sa milyun-milyong Pilipinong mababa ang kita na apektado ng pagtaas ng presyo ng langis at mga pangunahing bilihin.
Sa isang video message, sinabi ng Pangulo na layunin ng pinalawak na UPLIFT Assistance na mabawasan ang epekto ng tumataas na gastusin sa mga pamilyang Pilipino, lalo na sa mga nasa laylayan ng lipunan.
“Kapag tumataas ang gastusin, mas bumibigat ang pasanin ng bawat pamilyang nagsisikap tugunan ang kanilang pangangailangan, lalo na ang mga Pilipinong nasa laylayan ng lipunan,” ani Marcos.
Ayon sa Pangulo, inaasahang makikinabang sa programa ang 7.5 milyong kabahayan, o tinatayang 37.5 milyong Pilipino sa buong bansa. Pangungunahan ng Department of Social Welfare and Development (DSWD) ang pagpapatupad ng programa katuwang ang iba pang ahensya ng pamahalaan.
Sa ilalim ng pinalawak na ayuda, makatatanggap ng isang beses na karagdagang cash assistance na hanggang ₱2,000 ang 3.5 milyong benepisyaryo ng Pantawid Pamilyang Pilipino Program (4Ps) at Walang Gutom Program.
Magkakaloob din ang pamahalaan ng ₱2,000 kada buwan mula Hulyo hanggang Disyembre sa 2.5 milyong mahihirap at near-poor households na natukoy sa pamamagitan ng 2024 Community-Based Monitoring System (CBMS).
Kasama rin sa programa ang 1.5 milyong low-income workers at kanilang mga pamilya na napatunayang kuwalipikado batay sa talaan ng Social Security System (SSS), na tatanggap din ng ₱2,000 buwan-buwan sa parehong panahon.
Ayon kay Pangulong Marcos, layunin ng UPLIFT Assistance na mapanatili ang kakayahan ng mga pamilyang Pilipino na matustusan ang kanilang pang-araw-araw na pangangailangan sa gitna ng patuloy na pagtaas ng presyo ng mga bilihin.
Tiniyak din ng Pangulo na mabilis, episyente, at maginhawa ang pamamahagi ng ayuda sa pamamagitan ng paggamit ng mga digital payment channels upang mas madaling maabot ang mga benepisyaryo.
Discussion about this post