Mahigit 5,400 kabahayan sa bayan ng Looc ang nakinabang sa rice assistance program ng lokal na pamahalaan na pinondohan sa pamamagitan ng ₱5 milyong Local Government Support Fund (LGSF) ng pambansang pamahalaan.
Ang Local Government Support Fund (LGSF) ay isang pondo mula sa national government na ipinagkakaloob sa mga lokal na pamahalaan upang pondohan ang mga programang tumutugon sa pangangailangan ng kanilang mga nasasakupan, kabilang ang mga proyekto sa food security, social protection, disaster response, at iba pang development initiatives.
Ayon kay Looc Mayor Lisette Arboleda, naging posible ang malawakang pamamahagi ng bigas dahil sa pondong ipinagkaloob sa kanilang bayan sa ilalim ng administrasyon ni Pangulong Ferdinand R. Marcos Jr.
Sa ilalim ng programa, tumanggap ng tig-40 kilo ng bigas ang mga senior citizen, persons with disabilities (PWDs), at solo parents na kasalukuyang walang natatanggap na anumang pensyon. Mahigit 1,000 benepisyaryo mula sa mga sektor na ito ang nabigyan ng ayuda.
Bukod dito, nakatanggap din ng tig-10 kilo ng bigas ang halos 4,000 kabahayan na nakatala sa 2024 Community-Based Monitoring System (CBMS).
Sa kabuuan, umabot sa 5,433 kabahayan sa buong bayan ng Looc ang nakinabang sa rice assistance program.
Sinabi rin ni Arboleda na isasailalim sa beripikasyon ang mga residenteng hindi naisama sa 2024 CBMS upang matukoy kung maaari rin silang mabigyan sakaling may matirang suplay ng bigas.
Nagpasalamat naman ang mga benepisyaryo sa natanggap na ayuda.
“Nagpapasalamat po ako. Malaking biyaya po ito lalo na at mataas ang presyo ng bigas. Nagpapasalamat po ako kay Pangulong BBM dahil malaking tulong ito sa amin,” ani Lezel Caunca, isa sa mga benepisyaryo.
“Nagpapasalamat po ako sa gobyerno sa ibinigay na bigas. Abo gid nga salamat gid,” ani ni Thelma Andres, isa sa mga benepisyaryo ng programa.
Ayon sa lokal na pamahalaan, layunin ng programa na makatulong sa mga pamilyang higit na nangangailangan at mapalakas ang food security sa komunidad.
