Tumanggap ang Bulwang Gabawan Nagkakaisa (BUGANA) Sustainable Livelihood Program (SLP) Association ng mga vegetable seeds at kagamitang pang-agrikultura mula sa Department of Agriculture (DA) at mga katuwang na ahensya upang mapalakas ang produksyon ng high-value crops at mapabuti ang kabuhayan ng mga miyembro nito sa Barangay Gabawan, Odiongan.
Ang BUGANA SLP Association ay binubuo ng mga residente ng Barangay Gabawan na nabuo sa tulong ng Department of Social Welfare and Development (DSWD) sa ilalim ng Sustainable Livelihood Program (SLP) upang magkaroon ng organisadong pagkakakitaan at mapalago ang kanilang kabuhayan.
Sa ilalim ng High Value Crops Development Program (HVCDP) ng DA, ipinagkaloob sa asosasyon ang 10 kilo ng assorted vegetable seeds at apat na plastic drums na gagamitin sa pagtatanim at iba pang gawaing pang-agrikultura.
Naipamahagi ang mga kagamitan sa pamamagitan ng pagtutulungan ng DA MIMAROPA, Office of the Provincial Agriculturist (OPAG)-Romblon, Agricultural Program Coordinating Office (APCO), at Municipal Agriculture Office (MAO)-Odiongan.
Ayon kay Rosalie Perez, isa sa mga miyembro ng asosasyon, malaking tulong ang mga ipinagkaloob na binhi at kagamitan upang mapataas ang kanilang ani at mapalakas ang kanilang kabuhayan.
“Taos-puso kaming nagpapasalamat sa Kagawaran ng Agrikultura. Malaking tulong po ang 10 kilos na assorted seeds at apat na drum para sa aming pagsasaka. Magsisilbi po itong inspirasyon upang lalo naming mapaganda ang aming ani at matulungan ang aming mga pamilya,” ani Perez.
Ayon sa DA, bahagi ng programa ang pagpapalakas ng produksyon ng mga high-value crops, pagsusulong ng food security, pagtataguyod ng organikong pagsasaka, at pagpapabuti ng kabuhayan ng mga maliliit na magsasaka sa pamamagitan ng sustainable livelihood interventions.
Inaasahang makatutulong ang mga ipinamahaging binhi at kagamitan upang mapalawak ang produksyon ng gulay ng BUGANA SLP Association, madagdagan ang suplay ng sariwang gulay sa komunidad, at mapataas ang kita ng mga magsasaka sa Odiongan.
