Patay ang American marine biologist at conservation scientist na si Dr. Kent Carpenter, 73, matapos barilin sa loob ng kanyang bahay sa Barangay Ajong, Sibulan, Negros Oriental noong gabi ng July 12.
Ayon sa Police Regional Office–Negros Island Region (PRO-NIR), tatlong hindi pa nakikilalang lalaki ang sapilitang pumasok sa bahay ni Carpenter bandang 11:30 p.m. habang nanonood siya ng telebisyon kasama ang kanyang 34-anyos na Filipina companion.
Isa sa mga suspek ang umano'y bumaril kay Carpenter sa ulo, na naging sanhi ng kanyang agarang pagkamatay. Sugatan naman ang kanyang kasama at kasalukuyang sumasailalim sa medical at forensic examination.
Hindi pa matukoy ng mga awtoridad ang motibo sa pamamaslang. Bumuo na ang PRO-NIR ng isang Special Investigation Task Group upang pabilisin ang imbestigasyon at matukoy ang mga responsable sa krimen.
Patuloy ang backtracking at forward tracking operations ng pulisya, kabilang ang pagsusuri ng CCTV footage, panayam sa mga testigo, intelligence validation, at reconstruction ng galaw ng mga suspek bago at matapos ang insidente.
Mariing kinondena ni PRO-NIR Regional Director PBGen. Romano Cardiño ang pamamaslang at tiniyak na paiigtingin ang operasyon upang maaresto ang mga salarin at maihatid ang hustisya.
Si Carpenter ay isang kilalang ichthyologist o dalubhasa sa pag-aaral ng mga isda at mahigit limang dekada nang nagsasagawa ng pananaliksik sa yamang-dagat ng Pilipinas.
Kabilang siya sa mga may-akda ng 2005 scientific study na nagdeklara sa Verde Island Passage bilang “center of the center of marine shore fish biodiversity,” isang pag-aaral na nagpatibay sa pagkilala sa Pilipinas bilang sentro ng pandaigdigang marine biodiversity.
Isa rin siya sa mga nagsusulong na ideklara ang Verde Island Passage bilang UNESCO World Heritage Site.
Nagluksa ang iba't ibang siyentipiko at environmental organizations sa pagpanaw ni Carpenter. Sa pahayag ng Tubbataha Reefs Natural Park and World Heritage Site, kinilala siya bilang isang mahusay na siyentipiko na boluntaryong nagbahagi ng kanyang kaalaman upang mapangalagaan ang yamang-dagat ng bansa.
Patuloy naman ang imbestigasyon ng pulisya habang nananatiling pinaghahanap ang tatlong suspek.
Discussion about this post