Nanawagan si Cajidiocan Mayor Atty. Marvin Ramos sa mga magulang, guro, at mga opisyal ng barangay na paigtingin ang paghahanda at pagpapalawak ng kaalaman sa tamang pagtugon sa lindol kasunod ng sunod-sunod na pagyanig na naramdaman sa lalawigan nitong mga nakaraang araw.
Hinimok ng alkalde ang mga magulang na kausapin ang kanilang mga anak upang ipaliwanag ang kahalagahan ng pananatiling kalmado at pag-iwas sa panic sa oras ng lindol.
Pinayuhan din niya ang mga guro na bago magsimula ang klase ay muling ipaalala sa mga estudyante ang mga earthquake safety protocol at ang tamang mga hakbang na dapat gawin sakaling muling makaranas ng pagyanig.
Nanawagan din si Ramos sa mga opisyal ng barangay at lokal na pamahalaan na tiyaking laging handa ang kanilang mga komunidad sa anumang sakuna.
Ayon sa alkalde, mahalagang balikan at i-update ang mga contingency plan, magsagawa ng regular na earthquake drills, at tiyaking alam ng lahat ng opisyal at mga kawani ang kani-kanilang tungkulin upang maging mabilis at maayos ang pagtugon sa oras ng emerhensiya.
Ang panawagan ni Ramos ay kasunod ng magkakasunod na lindol na nagmula sa Claveria, Masbate na naramdaman sa iba't ibang bahagi ng Romblon, kabilang ang magnitude 5.4 noong July 13 at magnitude 5.2 na aftershock noong July 14.
