Namahagi ang Department of Social Welfare and Development (DSWD) ng P5.64 milyong tulong-pangkabuhayan sa 564 benepisyaryo mula sa iba't ibang barangay sa Odiongan noong Hunyo 18.
Bawat benepisyaryo ay tumanggap ng tig-P10,000 bilang panimulang puhunan para sa kanilang napiling kabuhayan kabilang ang sari-sari store, pag-aalaga ng baboy, food vending, pagsasaka, pangingisda, at iba pang income-generating activities.
Ayon kay Gare Gaa ng DSWD Romblon, ang kabuuang pondong P5,640,000 ay inilaan para sa mga indibidwal na benepisyaryo at mga organisadong grupo na inendorso sa pamamagitan ng mga tanggapan ng mga alkalde at bise alkalde sa lalawigan.
Ang tulong ay ipinagkaloob sa ilalim ng Sustainable Livelihood Program (SLP), isa sa mga programa ng DSWD na naglalayong matulungan ang mga indibidwal at pamilyang may mababang kita na makapagtatag ng pangmatagalang pinagkukunan ng kabuhayan.
Upang matiyak na magagamit ang pondo para sa itinakdang layunin, nagtalaga ang DSWD ng mga accredited merchant sa payout venue kung saan direktang bumili ang mga benepisyaryo ng mga kagamitan, materyales, at iba pang pangangailangan para sa kanilang kabuhayan.
Kinailangan ding magsumite ng opisyal na resibo ang mga benepisyaryo bago makaalis sa lugar ng pamamahagi.
Ayon sa DSWD, karamihan sa mga benepisyaryo ay naglaan ng kanilang puhunan para sa livestock-raising projects habang ang iba naman ay para sa pagsasaka, pangingisda, food processing, at maliliit na negosyo.
Sinabi rin ng ahensya na patuloy nitong pinapalakas ang monitoring at reporting mechanisms upang masubaybayan ang implementasyon ng programa at progreso ng mga kabuhayang itinayo ng mga benepisyaryo.
Kabilang sa mga tumanggap ng tulong si Eduardo Antonio ng Barangay Pato-o na nagsabing gagamitin niya ang puhunan upang mapalawak ang kanyang kabuhayan sa sektor ng agrikultura.
Samantala, sinabi naman ni Geneva Delos Reyes ng Barangay Canduyong, na nagtitinda ng mga kakanin, na makatutulong ang tulong upang mapanatili at mapalago ang kanyang maliit na negosyo.
Nagpasalamat naman ang mga benepisyaryo sa pambansang pamahalaan, lokal na pamahalaan, at mga ahensyang nagpapatupad ng programa para sa ipinagkaloob na tulong-pangkabuhayan.
