Nagpasalamat ang mga benepisyaryo ng rice assistance sa Santa Maria, Romblon sa pamahalaan ni Pangulong Ferdinand R. Marcos Jr. dahil sa tulong na inaasahang makababawas sa kanilang gastusin sa pagkain at makatutulong sa pang-araw-araw na pangangailangan ng kanilang pamilya.
Kabilang sa mga benepisyaryo si Jeraldine Francisco, residente ng Barangay Bonga, na nagsabing magagamit nila ang bigas para sa pang-araw-araw na pagkain ng kanyang mga anak na nag-aaral.
Ayon kay Francisco, malaking tulong ang bigas dahil ang perang karaniwang inilaan sana sa pagbili nito ay maaari na niyang gamitin bilang baon ng kanyang mga anak.
Nagpahayag din ng pasasalamat si Teresita Mangaya, isang retiradong guro, na nagsabing makatutulong ang bigas sa pagtugon sa pangangailangan ng kanilang pamilya sa pagkain.
Nagpasalamat din siya kay Pangulong Marcos sa pagbibigay ng naturang tulong sa mga Pilipino.
Sa Santa Maria, target na makatanggap ang 2,756 household ng kabuuang 20 kilo ng bigas bawat isa sa ilalim ng rice assistance program na pinondohan ng ₱5 milyong Local Government Support Fund (LGSF) ng pambansang pamahalaan.
Ayon kay Santa Maria Mayor Lorelie Fabon, unang 10 kilo muna ang ipinamahagi sa mga benepisyaryo, habang inaasahan ang karagdagang 10 kilo sa mga susunod na linggo upang makumpleto ang 20 kilo bawat household.
