Nakatakdang ipatupad ng lokal na pamahalaan ng Santa Maria ang mga proyektong pang-imprastraktura na nagkakahalaga ng ₱25 milyon sa ilalim ng Local Government Support Fund (LGSF) ng pambansang pamahalaan.
Ayon kay Santa Maria Mayor Lorelie Fabon, nakalaan ang naturang pondo para sa mga proyektong pang-imprastraktura na kasalukuyan pang hindi naipatutupad ngunit nakatakdang sundan ng implementasyon.
Kabilang sa target ng lokal na pamahalaan ang pagpapaayos o pagpapatayo ng kalsadang patungo sa palengke ng bayan upang mapabuti ang access ng mga residente sa pamilihan.
“Actually, sa ngayon po ang aming target po ay kalsada papunta po sa palengke na kung saan may wet market na itatayo ng bayan ng Santa Maria,” ani Fabon.
Bukod sa mga proyektong pang-imprastraktura, naglaan din ang lokal na pamahalaan ng ₱5 milyon mula sa LGSF para sa pamamahagi ng bigas sa mga pamilya sa bayan.
Sa ilalim ng naturang rice assistance program, target na makatanggap ang 2,756 household ng kabuuang 20 kilo ng bigas bawat isa.
