Iimbestigahan ng Bureau of Fisheries and Aquatic Resources (BFAR) ang naiulat na pagkamatay ng ilang isda sa mga baybayin ng ilang barangay sa Odiongan nitong mga nakalipas na araw.
Ayon kay BFAR Romblon Officer-in-Charge Provincial Fishery Officer Luisito Manes, hindi pa kumbinsido ang kanilang tanggapan na dulot ng El Niño ang fish kill dahil maaga pa umano para maiugnay ito sa inaasahang epekto ng naturang kondisyon.
Sinabi rin ni Manes na nakaranas pa ng pag-uulan ang lalawigan nitong mga nakalipas na araw at isolated ang mga naitalang insidente.
“Isolated lang kasi siya, posible din kasing namatay dahil sa illegal fishing, yung mga isda katulad ng cyanide fishing,” ani Manes sa panayam ng Romblon News Network.
Ayon sa BFAR, kinakailangan munang suriin ang water quality sa mga lugar na pinangyarihan ng fish kill upang matukoy ang posibleng sanhi ng pagkamatay ng mga isda.
Sinabi kahapon ni Arnulfo Mainit Jr. ng Municipal Agriculture Office (MAO) ng Odiongan na naitala ang fish kill sa Barangay Panique, Canduyong, Libertad at Gabawan. Iniuugnay ng MAO ang insidente sa matinding init ng panahon o El Niño.
Ipinaliwanag ng MAO na maaaring maapektuhan ang maliliit na organismo at isda sa mabababaw na bahagi ng dagat kapag mataas ang temperatura ng tubig, partikular kapag nagkakaroon ng low tide sa tanghaling tapat.
Ayon kay Manes, patuloy na aalamin ng BFAR ang sanhi ng insidente, kabilang ang pagsusuri sa kondisyon ng tubig sa mga lugar na naiulat na naapektuhan
