Opisyal nang naging regular na kategorya sa Division Schools Press Conference (DSPC) 2026 ang Mobile Journalism (MoJo), na isinagawa sa Looc National High School bilang bahagi ng Romblon Academic Contest for Excellence (RACE).
Sa kauna-unahang pagkakataon, nagtagisan ang mga kalahok mula sa iba't ibang pampubliko at pribadong paaralan sa buong Division of Romblon sa ilalim ng opisyal na kategoryang Mobile Journalism para sa sekundaryang antas.
May mahabang kasaysayan ang MoJo sa mga kompetisyon sa campus journalism. Una itong sinubukan bilang exhibition event sa National Schools Press Conference (NSPC) noong 2021, kasabay ng panahon ng mga virtual conference, bago patuloy na pinalawak bilang exhibition contest sa mga sumunod na taon, kabilang ang NSPC 2025 sa Ilocos Sur.
Ngayong taon, ganap nang isinama ang Mobile Journalism bilang regular na kompetisyon para sa secondary level, mula sa mga localized press conferences hanggang sa NSPC 2026 sa Ormoc City.
Mas naging makasaysayan ang unang pagpapatupad nito sa Division of Romblon matapos hiranging kauna-unahang DSPC Mobile Journalism (Filipino) Champion si SG Simbolon ng host school na Looc National High School.
Ginabayan si Simbolon ng kanyang coach na si Oliver Villaruel.
Kapansin-pansin din ang kanyang pagkapanalo matapos niyang makamit ang kampeonato gamit lamang ang isang Android-type mobile phone, sa kabila ng pakikipagkompetensya sa mga kalahok na gumagamit ng mas matataas na unit, kabilang ang mga iOS device.
Dahil sa kanyang pagkapanalo, si Simbolon ang magiging kinatawan ng Division of Romblon sa kategoryang Mobile Journalism (Filipino) sa nalalapit na Regional Schools Press Conference (RSPC).
Si Norman Madeja Ebreo II naman ang kauna-unahang mobile journalism champion sa English category sa gabay naman ni Jeric Tacasa Costales na nagmula sa San Andres National Highschool.
Itinuturing ang pagkakatatag ng MoJo bilang regular na kategorya bilang pagkilala sa patuloy na pagbabago ng pamamahayag sa campus, kung saan ginagamit ng mga batang mamamahayag ang mobile technology sa pagbuo at paghahatid ng mga balita at iba pang multimedia content.
